٥ مميزات لأنك تتفرج على التليفزيون مع مامتك

08/08/2019

كل واحد في مرحلة من عمره بيبدأ يحس بالرغبة في الاستقلالية عن أهله، وأحيانًا المضايقة من الفجوة اللي بينه وبينهم، بس بمجرد ما بتعدي مرحلة المراهقة وبتبدأ مرحلة النضج، بتحن للأمان الموجود في قعدتك معاهم مهما كان كبر الاختلافات اللي بينكوا، وخلينا نقول بشكل خاص الوقت اللي بتقضيه مع مامتك.

نسبة كبيرة من الأمهات بيبقوا تركيزهم معظم حياتهم على مشاغل بيتهم وأولادهم، ده بيخليهم بنسبة ما تعليقاتهم شبيهة بتعليقات الأطفال، لأنها بتبقى بريئة من كل لغة العصر ومستجداتها، عشان كدة هتفضل قاعدتك قدام التليفزيون مع مامتك لها متعة خاصة وهنا هنجمع شوية مميزات لأنك تسهر تتفرج مع معاها على حاجة.

1- هيقولولك تعليقات على الأحداث كأنه ماتش كورة، هيلفتوا نظرك إن الفيلم ممكن يتشاف من وجهة نظر مختلفة تمامًا.

2- هتبرزلك أهمية الدقة في أي عمل فني، لو طفل صغير المفروض إنه مولود هتقولك إنه مستحيل يكون لسة مولود دلوقتي، لو ممثلة كبيرة وبتعمل دور أصغر منها هتفتكرلك بدايتها كانت إمتى وتخلي الدور يفقد منطقيته تمامًا.

3- هتعملك أكل وحلويات أو تجيبلك فاكهة زي ما إنت عايز حتى لو مش هتشاركك في أكلها.

4- هتكتشف معاها عالم برامج الطبخ عشان تعرف إن لعنة Save post دي مش جاية من برة.

5- هتثبتلك إن فيه أسئلة وجودية لا تموت عن أهل البطلة إزاي يسيبوها كده؟ وإزاي فلانة تلبس فستان زي ده؟ وهما مش خايفين يمشوا لوحدهم في الضلمة كده؟

Comments: