10 نصايح تساعدك ترجع شغلك بعد الأجازة

15/08/2019

بعد أجازة نسبيًا طويلة، مفيش أصعب من الرجوع للشغل مرة تانية، مهما كنت بتحب شغلك، العودة لنفس الروتين اليومي، المجهود، المسؤولية، الضغط أحيانًا، مش أحسن حاجة ممكن تحصلك مقارنة بأيام الراحة، سواء كنت قضيتها في حركة وسفر وتغيير كبير، أو قضيتها نوم في البيت.

عشان كده، جمعناك شوية نصايح، تساعدك ترجع الشغل تاني من غير تكدير أو إحباط زي ما ذكر موقع " Bustle".

1- ارجع يوم بدري

لو كنت مسافر أو في رحلة برة بيتك، ارجع يوم بدري عن أول يوم شغل، عشان تلحق تستقر في مكانك تاني، تفك شنطك، تغسل هدومك، تنام كويس وتقدر تصحى أول يوم شغل مفوق.

2- شغل الرد الآلي من إيميلك

عشان ما ترجعش تلاقي الدنيا "هايصة" حرفيًا، وبريدك مليان على أخره، تقدر تشغل الرد الآلي على الإيميل إنك برة الشغل في أجازة "Out-Of-Office Responder"، فاللي محتاجك ضروري يقدر يكلمك ضروري أو يلجأ للبديل المتاح.

3- ما تحاولش تعمل شغلك كله مرة واحدة

أكيد أما ترجع هتلاقي عندك شغل كتير محتاج تبدأ فيه، لكن المطلوب منك عشان تقدر تنجز في النهاية من غير ما تكتئب أو تبقى عايز تهرب، هو إنك تقسم المهام اللي عليك حاجة أو اتنين كل يوم لحد ما تبدأ تدخل في مود الشغل تاني.

4- ارجع لروتينك الطبيعي

حاجات بسيطة مرتبطة ببرنامج يومك، زي مشروبك الصباحي سواء قهوة أو شاي، ومكانه، بتحب تعمل إيه أول ما تصحى؟ بتمهد لنفسك إزاي عشان تبدأ شغل؟ ممكن تساعدك ترجع لروتينك واحدة واحدة.

5- نظّم إيميلاتك/ مهامك

سواء كانت الوسيلة اللي بتستخدمها في شغلك هي البريد الإليكتروني أو أي أداة خاصة بشركتك، نظّم المهام والإيميلات اللي عندك قبل ما تبدأ تشتغل فيها أو ترد عليها، لأنك ممكن تبدأ بحاجة مش مستعجلة وتسيب حاجة طارئة أكتر وإنت مش واخد بالك، عشان كده حاول تبدأ من الأقدم للأحدث، من اللي وصلك أول ما اخدت الأجازة لحد ما توصل لأول يوم شغل.

6- اعمل قايمة مهام To do list

قبل ما ترجع شغلك بيوم اعمل قايمة بالحاجات اللي عليك تعملها أول ما توصل، نظمها بعد وصولك المكتب خصوصًا لو ظهرت حاجات جديدة، واطلب مساعدة فريقك أو مديرك لإنجاز الحاجات المتعطلة.

7- حط في جدولك مواعيد استراحات

مش عيب إنك تحط استراحات في جدول يومك أكتر من اللي بتاخدها في جدولك العادي، تساعدك شوية على ما ترجع للواقع وتاخد على الشغل من تاني.

8- هات حاجات من ريحة الأجازة

لو سافرت مكان، أو قعدت في البيت تشوف أفلام مثلًا أو مسلسلات، هات لمكتبك حاجات من ريحة الأجازة، تذكار من المكان اللي سافرته، أو صورة من فيلم حبيته، دة هيساعدك تحس إن طاقتك متجددة وإن الأجازة ماكنتش حلم وراح.

9- نظّم أولوياتك

اعرف الحاجات اللي وراك وابدأ بالحاجات الأسهل أو اللي تاخد وقت أقل، فتقدر تخلص أكتر من حاجة في اليوم، دة هيديك إحساس إنك بتنجز وهيأهلك بالتدريج للدخول في مود التاسكات التقيلة تاني.

10- نام كويس

قلة النوم هتخليك مضايق ومقريف بجانب فكرة رجوع الشغل، حاول تساعد نفسك إنك تاخد أكبر قدر من النوم، ممكن تشرب لبن سخن، أو تستخدم الأعشاب الطبيعية اللي بتهدي الأعصاب وتساعد على النوم.

Comments: