5 حاجات عشان تتعامل مع شخص فقد حد عزيز عليه

15/08/2019

في الأيام الأخيرة، نشر الفنان أحمد السعدني "بوست" على صفحاته الشخصية على وسائل التواصل الاجتماعي، بينعي فيه طليقته اللي اتوفت فجأة بأزمة قلبية، بإنه بيحكي قصة حبهم بدأت إزاي وتقصيره معاها وتقصيرها معاه، لحد ما وصل الموقف إنها تتوفى في سن صغير بدون سابق إنذار وقبل ما يقدر يرجعلها في الوقت اللي مخططله مع نفسه.

ماحدش يقدر يفرض على الناس إنهم يتعاطفوا مع موقف مش مقتنعين بيه غصب عنهم، لكن يمكن الظالم هنا هو عكس تجاربنا الشخصية على شخص في حالة حزن، أو التعامل معاه على إنه مثال لكل الأشخاص السيئة اللي ممكن تكون قابلتها أو قابلتيها في حياتها، وصب غضبك عليه، في حين إن تجربته وتفاصيلها هو بس الأدرى بيها.

كلام شخص في الحالة دي نوع من الفضفضة والمشاركة في لحظة صعبة وفارفة في حياته، وعواقب التعامل الخاطئ مع اللحظات دي ممكن تبقى حياة الشخص ده أو سواءه النفسي مدى الحياة، ودي نفس الغلطة اللي ممكن تعملها مع شخص قريب منك لما يمر بنفس الحالة لمجرد إنك شايفه غلطان أو ما عملش اللي كنت هتعمله إنك لو مكانه أو اللي كنت تتمنى يتعمل معاك وما اتعملش.

عشان كدة جمعنالك أهم النقط اللي لازم تراعيها لو عندك حد بيمر بحالة حزن أو فقد حد عزيز عليه زي ما ذكرها موقع "Help guide"

1- افهم كويس مشاعر الحزن

- مفيش صح وغلط في الحزن وفي أفكاره وطرق التعبير عنه.

- الحزن أحيان كتير ممكن يكون فيه مشاعر متطرفة زي الغضب أو الإحساس بالذنب أو الخوف من التعامل مع الناس.

- مفيش وقت محدد للتعافي من الحزن والانتحاب على حد فقدناه، ما تضغطش على حد بتحبه عشان يطلع من حالة هو فيها حتى لو كان عشان خايف عليه.

2- اعرف المفروض تقول إيه؟

- ما تتجاهلش الموقف خلال كلامك، اتكلم عن اللي حصل واستخدم ألفاظ واضحة زي الموت وزي سيرة الشخص اللي مات، دة هيحسس اللي بتواسيه إنه يقدر يتكلم في الموضوع.

- عبر عن قلقك على الشخص اللي قدامك.

- اسأله عن مشاعره، ولو مريت بتجربة مشابهة ممكن تشاركها معاه لكن من غير ما تستخدم أسلوب إنك عارف وواثق هو حاسس بإيه، لأن كل واحد له تجربته ومشاعره.

- اقبل مشاعر اللي قدامك، وحسسه إنك يقدر يعبر عن اللي جواه قدامك، يعيط، يغضب، ينهار من غير ما تحكم عليه.

- ما تستخدمش الكلام التقليدي المحفوظ، قول اللي حاسس بيه فعلًا، وممكن تكتفي إنك تعبرله إنك ما عندكش حاجة تقولها لكن إنت مهتم بكلامه ومنصت له.

- خلي عندك صبر على السكوت، مش لازم كل ما تقابله تتكلموا، لو هو مش قادر يتكلم أو ما عندكش حاجة تقولها، اكتفي بإنك تقضي وقت معاه وتحسسه إنك موجود.

3- اعرض مساعدات عملية

زي المساعدة في إجراءات الدفن والجنازة، أو إنك تهتم بأكله وشربه، بأولاده أو بمهام البيت، بصحته أو بإنك تقضي معاه وقت مش عايز يكون فيه لوحده.

4- ادعمه على المدى الطويل

- الدعم بعد وقت الجنازة والدفن والمعزّين أهم بكتير من مجرد وقت الخبر، لأنه هيكون لوحده بعد كده بيواجه بالفعل فقد الشخص العزيز عليه ده.

- ما تعملش استنتاجات من المظاهر، ما تفضلش طول الوقت تقوله إنت قوي، او شكلك أحسن كتير، لأن ده بيخليه مضغوظ وبيحاول يخبي مشاعره عشان يفضل بالمظهر المرضي بالنسبة للناس كده.

- اعرف إن الحزن ممكن ما ينتهيش أبدًا، بعد فقد بعض الأشخاص ممكن حياة الواحد تتغير وما ترجعش زي ما كانت، واللي يحصل بس هو عملية تقبل للواقع، وإن الألم يقل، لكن الحزن ممكن ما يروحش للأبد.

- زود اهتمامك في أيام معينة، زي الأعياد أو المناسبات اللي المفترض فيها لمة أو المرتبطة بالشخص المتوفي، واعرض دايمًا مساعدتك ووضح إنك موجود في الأيام دي.

5- ما تتجاهلش علامات الاكتئاب

من الشائع في حالات الفقد إن الواحد بيبقى محبط ومشوش ومش قادر يتواصل بشكل كويس مع الناس اللي حواليه، لكن لو لقيت اللي قدامك مش بيتحسن بالتدريج أو حالته بتسوء مع الوقت أكتر، لازم تاخد بالك إنه ممكن يكون داخل على اكتئاب مرضي، واعراضه:

صعوبة في أداء الوظايف اليومية البسيطة

تركيز كبير على الموت

غضب وإحساس بالذنب مستمرين

تجاهل النضافة الشخصية

الاتجاه لإدمان المخدرات أو الخمور

عدم القدرة على الاستمتاع بالحياة

احساس مستمر بفقدان الأمل

الكلام عن الموت والانتحار

Comments: