٩ حاجات أساسية بتحصل في جروبات الستات على الفيسبوك

16/08/2019

جروبات الفيسبوك هي دايما مكان يقلق بالنسبة لأي حد عادي يعني بغض النظر إنك أكيد داخل الجروب عشان سبب معين أو استفادة معنية عايز تستفدها منه، وأكتر نوع من الجروبات الغريبة هي جروبات الستات على الفيسبوك.

انتشر من كام فترة فيديو لبنت كانت بتعمل ماسك وكانت طالعه لايف على الجروب، وبعدين ولد دخل الجروب وكان بيتفرج عليها وكتب "كومينت"، وغالبا ده بيحصل إن راجل يدخل جروب بنات عشان الفضول، خلينا نقتل الفضول اللي عند الرجالة وأسألتهم عن إيه اللي بيحصل في جروبات البنات وهما مش عارفين:

1- هتلاقي لايف من غير أي مناسبات عشان واحدة بتجرب ماسكات أو بتجرب طبخة معينة وعايزة البنات تشارك معاها ويقولوا رأيهم 

2- أسئلة عن "Skin care" والكيرلي روتين، والسكراب "لو إنت راجل وبتقرأ مش هتفهم يعني إيه أصلا الحاجات دي"

3- أسئلة عن المشاكل الزوجية والطلاق والحموات، أو الارتباط عموما وقصص مأسوية وطلبات إن الستات تقول رأيها ويحلوا المشاكل معاها

4- "سكشوال ميمز" وكومنتات فيها البنات مش فاهمة يعني إيه اللي في الميم ده والكومينتات بتشرح الإفيه.

5- بوستس كتير بقى عبارة عن "بنات الفوتوشوب حد يعرف يشيل الديناصور اللي طالع ورايا في الصورة دي" أو "حد يعرف يقربني أنا وخطيبي لبعض؟" 

6- بوستس بتطلب من البنات حاجات مريبة زي "يا بنات وروني صورتكوا مع حد مشهور، أو وروني صورتكوا مع أحمد عز و أسر ياسين وحمدي الوزير" وهكذا.

7- حقد وحسد على الأنفلونسرز وحياتهم أو تريقة على أي فيديوهات معروفة. 

8- سكرينشوتس لرجالة متحرشين وحكايات عن حوادث تحرش وتشجيع ونصايح عشان لو واحدة اتعرضت لمواقف من دي 

9- بنات عايزة تبيع الفستان اللي كلفها الشئ الفلاني ولبسته مرة واحدة عشان تاخد فلوسه وتعمل فستان جديد.

Comments: