الفرق في النضج بين الرجالة والستات: الستات بتنضج فكرياً قبل الرجالة 

16/08/2019

الجملة المنتشرة اللي أغلب الناس بتقولها "اتجوزي واحد أكبر منك عشان البنات عقلها بيكبر قبل الرجالة"، وحتى أكيد كلنا لاحظنا ده في مراحل حياتنا خصوصا وإحنا صغيرين إن البنات في مرحلة البلوغ بينضجوا في حين إن الرجالة في نفس المرحلة بيتصرفوا كأنهم أطفال لسه، ده غير الجمل الكتير المنتشرة بين البنات وهي إن الرجالة عبارة عن أطفال بس كبار شوية وأغلب العلاقات الناجحة بيتعامل فيها الستات على إنهم هما الطرف الناضج في العلاقة.

العلماء قررروا يتأكدوا من الموضوع ده ويشوفوا هل هو إدعاءات من الستات ولا حقيقة، وعشان كده موقع academic نشر دراسة من جامعة Oxford بتقارن النضج اللي بيوصل له الرجالة والنضج اللي بيوصل له الستات في نفس الوقت، الدراسة كانت عبارة عن إن العلماء فحصوا دماغ 121 شخص من سنة 4 لـ 40 سنة، وبدأوا يلاحظوا التغييرات في الوظايف المختلفة طبعا مع اعتبار عمر وجنس المشتركين ولقوا نتيجتين:

1- الرجالة بتنضج بعد الستات في الحياة فعلا:

كشفت النتايج إن بالرغم من إن دماغ الرجالة والستات عندها نفس القدرات في تعاملات الحياة اليومية إلا إن الرجالة غالبا ما بيظهر عندهم تأخير في التطورات في الشبكات الوظيفية بالمقارنة مع الستات، عشان كده بيتقال إن الرجالة بينضجوا في عمر أكبر من الستات.

2- عقل الستات عقل فعال أكتر:

غير اللي تم ذكره فوق، كمان فيه بيانات بتأكد إن كفاءة دماغ الستات بشكل أكبر، وده اللي وضحه إدواردو كاليكسو ، أستاذ علم وظائف الأعضاء وعلم الأدوية في كلية الطب في جامعة الأمم المتحدة في أمريكا وقال إن بالرغم من دماغ الرجالة أكبر من دماغ الستات إلا إن دماغ الستات بتمثل كفاءة أعلى، فمثلا عقل الست فيه ذاكرة أقوى ووصلات عصبية أكتر وإدراك مفصل للألوان والنكهات.

عموما بفضل العلم والدراسة دي يعني اللي نقدر نقوله بغض النظر عن المقارنة إن فعلا فيه اختلاف بين دماغ الراجل والست وطريقة عمل كل واحد منهم، وده اللي بيفسر الاختلاف في السلوك ودرجة النضج العاطفي لكل منهم.

Comments: