٧ أسباب هتخليك تبطل تستخدم "دكتور جوجل": هيطلعك صاحب مرض دايما

29/08/2019

كام مرة كنت تعبان أو حاسس بأعراض معينة وبدل ما تروح لدكتور أو تسأل حتى دكتور، قررت تمسك موبايلك وتفتح جوجل وتكتب الأعراض اللي عندك وتدور أونلاين؟ والطبيعي جدا إن فعلا محدش بيستمتع بمشوار الدكتور ده عشان أسباب كتير ملل وانتظار وكشف وفلوس كتير وغيره يعني وغالبا ده من أكبر الأسباب اللي بتخلي الناس تستخدم "دكتور جوجل".

وإنت بتستخدم "دكتور جوجل" مابتستناش دورك ولا بيدفعك فلوس أصلا، فأرخص كمان لكن فيه مشكلة كبيرة إنت مش واخد بالك منها وهو إنه مش دقيق ولا نتايج البحث بتاعك بيطلع معلومات علمية دقيقة، لإن أغلب الوقت هيطلعك يا حامل أو بتعاني من مرض نسبة الشفا منه قليلة جدا أو عندك سرطان، للسبب ده وللأسباب الجاية اعرف إنت ليه مش المفروض تستخدم "دكتور جوجل":

1- هيخليك تحس إنك صاحب مرض دايما:

عارف تقريبا إنك لو قولتله إن عندك زكام أو "بتشن" ممكن يقولك إن عندك إلتهاب رئوي؟ ده غير إن ممكن يخليك نحس إن شوية الصداع اللي عندك دول جايين من غدة درقية أو إلتهاب في المخ، ده غير أمراض إنت مش فاهمها أصلا ممكن تتوهم إنها عندك.

2- إنت مش واثق مدى صحة الموقع اللي إنت عليه:

بتختلف الجودة والثقة بين المواقع بشكل كبير، ممكن يبقي التكنيك اللي بيدقق في الأعراض دقيق في موقع ما وغير دقيق في موقع تاني، وإنت هتفضل مشتت بين الموقعين ومش فاهم حاجة.

3- هتفزع نفسك على الفاضي:

الإنترنت عموما عبارة عن ثروة من التناقضات والآراء المتناقضة والهبد الكتير على الكي بورد، وده من الأسباب الكتير اللي تخليك مش عارف الصح من الغلط، فلو كنت حاسس بشوية غثيان أو ترجيع مش بعيد الأنترنت يقولك إنك حامل.

4- بتشخص نفسك بنفسك:

أول ما بتحس بتعب بتفتح "جوجل" وتكتب الأعراض ولو طلعلك نفس التشخيص على أكتر من موقع إنت كده بتقتنع إن عندك المرض ده من غير دكتور ولا تحاليل ولا أشعة ومن كتر ما الفكرة بتسيطر على دماغك هتروح تقول لأهلك وصحابك إن عندك الكلية الشمال ضعيفة عن طريق بحث لا يتعدى الخمس دقايق على الإنترنت.

5- هيأخر طلبك للمساعدة الحقيقي:

لما تظهرلك نتايج بالمرض اللي عندك من غير ما تروح لدكتور غالبا إنت هتسكت على نفسك وهتعتبر حالتك كده اتشخصت وخلاص، في حين إنك فعلا لو تعبان أو في حالات معينة بيبقى الأفضل إنك تتعالج أسرع، وده ممكن يأخر العملية دي.

6- بعض المواقع بتقدم نصايح غريبة:

في الغالب بعض المواقع بعد ما بتشخص المرض والأعراض بتحاول تقدم شوية حلول للشخص التعبان بقى زي إنه يشرب أعشاب مش عارفة إيه وفي الغالب مايعرفوش حاجة اسمها دوا أو استشارة طبيبك الخاص اللي بتبقى مكتوبة في أخر كل نشرة دوا، ممكن يبقوا الناس اللي بيكتبوا المحتوى مش أشرار ولا قاصدين يضروا حد بس ماعندهمش العلم الكافي اللي بيقدموا بيه النصيحة.

7- أكيد الدكاترة مابيدرسوش 7 سنين على الفاضي:

عارف أي دكتور في حياتك؟ شوفت بيدرس كام سنة؟ شوفت بيقضي حياته كلها في المذاكرة والشغل ازاي؟ أكيد كل ده لسبب ما يعني، الطب صعب والموضوع بيبقى متعلق بفحص وإمكانيات لازم تراعيها وحاجات تتلاشاها.

Comments: