ليه لما بتشوف حاجة "كيوت" بتبقى عنيف معاها؟

18/08/2019

جربت قبل كده تشوف حاجة جميلة "كيوت"، طفل صغير، أو حيوان أليف، وتحس إنك عايز تضغط عليه بقوة، أو بتلاقي نفسك بتلاعبه بعنف؟ إنت مش لوحدك في ده! وطبقًا لدراسة عملتها جامعة "Yale" عام 2013 بينت إن ده اسمه "العنف اللطيف" وله سببين.

الدراسة اتعملت على عدد من الأشخاص اللي كانت بتظهر قدامهم فقاعات هواء، بالتزامن مع عرض عدد من الصور عليهم، متقسمة لأطفال أو حيوانات شديدة الرقة والبراءة، واللي بتكون سماتها زي العينين الواسعة أو الخدود المليانة، ومجموعة صور تانية لأطفال عاديين، ومجموعة أخيرة لكائنات غير جذابة.

التجربة كان هدفها تشوف إذا كان رد الفعل الإنساني اللي بيطلع هو رد فعل شفهي بس ولا بيكون فيه احتياج لشيء بدني، واكتشفوا إن إصرار الأشخاص واندفاعهم ناحية فرقعة الفقاعات اللي بتظهر قدامهم بيزيد جدًا مع رؤيتهم للصور الأجمل والألطف.

علماء النفس بيرجعوا ده لسببين، الأول هو نفس السبب اللي بيخليك تعيط وإنت فرحان، أو تضحك وإنت في موقف حزين، وده لأن نفسيتك مش بتستحمل فيض المشاعر الإيجابية اللي حاسس بيها وبتخليط تطلع رد فعل عكسي عشان تعمل اتزان نفسي وترجعك لطبيعتك تاني.

التاني هو نوع من الإحباط من شدة الإعجاب لأنك عايز ترعى الحاجة دي أو تمتلكها، على جانب تاني وعلى الرغم من انتشار ده على نطاق واسع من الناس إلا إن مش كلهم بيبقى ده شعورهم في اللحظات دي وفيه ناس أما اتسألت ماكانتش عارفة أصلًا بتتسأل على ولا ليه حد ممكن يحس كده!

Comments: