حقيقة "ميم" الطفل الغضبان.. قصة التورتة "نصباية"

18/08/2019

في الوقت الأخير انتشر "ميم" الطفل الأسمر، واللي هو عبارة عن 3 صور لطفل صغير شكله غضبان، ومتصور أكتر من صورة في مكان يبدو ستوديو وبوضع التصوير، لكن وهو محافظ على تكشيرته فيهم كلهم.

"الميم" مشهور عالميًا من وقت طويل، تقريبًا من السنة اللي فاتت، واشتهر بـ "طفل التورتة" واللي اسمه الحقيقي "ماكاري أرنولد"، التسمية جت من قصة اشتهرت من شخص كان بيدعي إنه أبوه طلع وحكى قصة محتواها إنه منعه من أكل قطعة تورتة قبل كده، فالولد زعل وقاله إنه مش هيبتسم تاني أبدًا، وما وقفش الموضوع عند كده، لكن الراجل ده بدأ يلم تبرعات من الناس لإسعاد ابنه مرة تانية!

تطور الموضوع للمرحلة دي، خلى أم "ماكاري" الحقيقية تظهر وتقول تصريحات إن دي كانت مجرد جلسة تصوير في مدرسة ابنها، في العام الدراسي 2017، واللي اتاخدتله في لحظة غضب شديدة له، وانتشار الصورة بالشكل الكبير ده على وسائل التواصل الاجتماعي حاجة هي ما تقدرش تعمل فيها حاجة دلوقتي، ومش هتقدر تنكر إن فيه حاجات فعلًا دمها خفيف ومضحكة، لكن اللي لازم يقف هو استغلال بعض الاشخاص لصورة ابنها في عمليات نصب ولم تبرعات بالشكل ده.

Comments: