إزاي تتعامل مع الشخص "الدراما كوين"؟

21/08/2019

في حياة كل واحد فينا الصديق أو زميل الشغل، النادي، أو الجيم، "الدراما كوين"، اللي بيكبر كل المشاكل، وحكاياته كلها "تحابيش" من نظرته الشخصية هو للعالم، وعشان تتعامل معاهم فيه شوية حاجات جمعنهالك زي ما قدمها "Wiki How".

1- تجنب تسألهم عن مشاعرهم

الشخص الدرامي دايمًا بيكون عايز مُستمع، عشان كده حاول دايمًا تقصر في الكلام، وتخليكي أحاديثك معاه مقتضبة ورسمية.

2-افهم المبالغات

مع خبرتك من الكلام مع الشخص ده، هتعرف إن الوضع دايمًا مش بالسوء اللي يبدو عليه، يعني لو قالك "مديري بيكرهني وأنا هتطرد قريب!" ممكن يكون ده مش معناه أكتر من لفت نظر بسيط أو توبيخ حصل في الشغل لكن ما يؤديش لنتيجة زي الطرد.

في الغالب "الدراما كوين" بيحب يعكس غلطاته على الناس اللي حواليه، وتكبير الموضوع بيبعد التركيز عن غلطته الحقيقية، وبيخليها على الأطراف التانية، فممكن الموضوع يتطور لخناقة معاك أو مع أي حد عن إنه مش مهتم بمشكلته بشكل كافي أو مش عايز يسمعه.

3- ركز على الأحداث والحقايق الملموسة

ملوك الدراما بيعملوا من كل قصة نسخة خاصة بيهم، يعني مثلًا لو سألتهم "فلان متأخر عن الشغل ليه؟" هتلاقيه بيدخل في تفاصيل زي قد إيه هو مضغوط في الشغل من تأخير زميله ده، أو إنه مش ممكن يتأخر بالشكل ده زي ما غيره بيعمل، في الحالة حاول ما تتماداش معاه، واطلب منه يجاوب على السؤال بشكل مباشر ويقول السبب الحقيقي المتعلق بالشخص المتأخر.

4- ما تكفائش التصرفات الغلط

الشخصية الدرامية عايزة اهتمام وبتحاول باستمرار تلفت الانتباه، حتى لو كان انتباهك ده إنك تنتقدهم أو تتخانق معاهم على تفاصيل مشاكلهم، على سبيل المثال لو الشخص ده زميلك في الشغل، ودخل الصبح مكشر، هو عايز كل الناس تسأله ماله وتديله فرصة يحكي عن سوء يومه ويشتكي منه، افتكر ساعتها إنك مش مضطر تكافيء التصرفات الغلط، وتديها رد الفعل اللي تخليها تستمر، فحاول تتجنب حتى التعليق السلبي.

5-اعرف مدى طاقتك

كل شخص له مساحته الشخصية، وطاقته على الاحتمال، مفيش أي حاجة تجبرك إنك تستحمل شخص تاني إلى ما لا نهاية، حدد كويس التصرفات اللي بيعملها الشخص الدرامي في حياتك وإنت مش بتتقبلها أو بتتماشى معاها غصب عنك، اعمل ليستة بيها عشان تبقى أفكارك واضحة، وترفض بوضوح التمادي فيها والضغط على نفسك.

مثلًا لو بيبالغ في الشكوى من الأمور المالية وهو غضبان، أو العكس، بياخد غضبه سبب إنه محتاج يخرج ويصرف كتير، وهو عارف إنك بتكافح في حياتك أو الكلام والتصرفات دي مش مناسبة ليك، لازم تعرف إنك دي تصرفات مش المفروض تتسامح معاها.

6- اعمل حدود واضحة

اتكلم معاه بشكل مباشر عن طريقة التواصل بينكوا لما يكون مضايق أو حابب يشتكي، ووضحله المواضيع اللي بتضغطك أو بتخليك مشدود من مشكلة هي مش مشكلتك لكن بتلمس أزمة حالية عندك.

7- خليك حاسم لما يبقى ده  ضروري

ملوك الدراما بيحبوا إثارة المشاعر، يتكلموا في موضوع يخلوك إنت كمان تنفعل عشان مشكلتك وتفقد سيطرتك، لما تلاقي اتجاه الحوار رايح للناحية دي، حاول توقفه، مش لازم تبقى حاد أو سخيف، لكن ممكن ببساطة تقوله إن ده موضوع مش حابب تتكلم فيه.

8- اطلب مساعدة طرف تالت

لو الشخص ده مُصر على موقفه من الضغط عليك باستمرار وحسمك معاه ما جابش نتيجة، حاول تشوف طرف تالت، أو صديق مشترك أو زميل في نفس المكان يساعدك في تغيير مجرى الحديث، من ناحية تانية لو هو مجرد زميل عمل، ممكن تلجأ لمديرك، يغير مكان شغلك أو أوقاتك.

9-واجه نفسك.. إنت بتحب الدراما؟

لو حياتك مليانة "دراما كوينز" ممكن تبقى المشكلة فيك، إنت بتجذبهم بشكل ما، عشان كده محتاج تواجه نفسك، هل إنت قاصد ده ولالا؟ ممكن مثلًا تبقى بتحس بالملل وحابب التشويق اللي بيعمله الشخص الدرامي على كل الأحداث، أو بتحب إحساس الرضا اللي بتلاقيه من مقارنة نفسك وأحوالك من حكاياته البائسة، في الحالة دي محتاج تفكر إزاي تملى الفراغ اللي في حياتك بهواية جديدة أو تجديد لاهتماماتك.

10- فرفش نفسك

لو التعامل مع الأشخاص الدرامية شيء لابد منه صعب تجنبه، يعني مثلًا هو زميلك في الشغل ولازم هتشوفه، يبقى حاول تسمع أغنية بتحبها أو تشوف مشهد مفضل ليك بعد ما تتكلم معاه أو في طريقك للبيت.

11- قضي وقت مع ناس إيجابية

كتر من الوقت اللي بتقضيه مع الناس اللي بتبسطك وبتخليك مبتهج، لو لا بد تشوف الشخص الدرامي يوميًا، حاول  تاخد استراحتك اليومية مع شخص تاني لطيف عشان تحس باتزان.

12- ابعد

لو الموضوع وصل لمرحلة خطر على نفسيتك ومسار حياتك، مش عيب إنك تبعد عن الشخص ده، تبطل تتواصل معاه أو ترد على التيلفونات والرسايل.

Comments: