ليه الناس بتحب "تفليرت" عن طريق الكتابة والرسايل أكتر من الحقيقة؟ 

21/08/2019

أغلب الوقت لما بيبقى فيه حد عاجبك مابتروحش تقوله على طول، بتقعد ترغي شوية معاه وتتكلم وفي نص الكلام بتفليرت، بس "الفليرتينج" بالنسبة للستات غير الرجالة، دوافع وأسباب الرجالة أغلب الوقت في "الفليرتيشن" بتكون لأغراض جنسية في حين إن الستات بتفليرت "For fun"، وطبعا في الوقت الحالى الواتساب والدي أم والماسنجير خلى موضوع "الفليرتينج" أسهل وده أكيد لما تحب تقول حاجة في الشات الموضوع بيبقى أسهل من لما تقولها في وش الشخص اللي قدامك وخصوصا لو هتفليرت يعني.

موقع psychology today قال إيه هي الأسباب اللي ممكن الشخص يبقى بيفليرت عشانها وقالوا إن فيه شخصين اسمهم (ناريسرا بونيانونت كارتر وتوماس فاجنر) عملوا دراسة في 2018 على دوافع الفليرتينج للجنسين، سواء كان عن طريق الشات أو في الحقيقة، وعملوا البحث بتاعهم على 400 طالب في الجامعة نصهم تقريبا كان مرتبط، وكان فيه 6 أسباب أساسية اجتمع عليهم الطلاب في موضوع التواصل بشكل عام، واللي من ضمنه التواصل للفليرتيشن

1- الانبساط: لإنه مثير ومسلي وبيخلي الشخص يقضي وقت حلو 

2- الاسترخاء: لإن التواصل بيبقى بهدف الراحة والاسترخاء أصلا

3- التحكم: إنك بتاخد حاجة معينة عايزها من حد بعينه

4- الهروب: عشان بتفصل عن الشغل أو الدراسة أو المهام اللي المفروض تعملها 

5- الخروج من الوحدة: لما بتتواصل مع أشخاص بتحس إن فيه ونس ووحدة أقل

6- المودة: عشان تساعد أو تشكر الناس 

 وفي نفس الدراسة سألوهم عن دوافعهم للفليرتينج سواء كان في الحقيقة أو في الشات، وأسباب الناس اللي بيفليرتوا في الحقيقة هي إنهم يوصلوا للشخص اللي قدامهم إنهم مهتمين وعشان ده شيء مسلي وممتع، في حين إن الناس اللي بيفليرتوا بالكتابة وفي الشات قالوا لإن ده بيريحهم وعشان يحسوا إن فيه حد بيبادلهم الإحساس ده أو بيعمل حاجة عشانهم.

وكان فيه فروق بين الجنسين في الفليرتينج لقوا إن الرجاله بيحبوا يفليرتوا في الحقيقة وفي وش الشخص اللي قدامهم عشان الهروب من الالتزامات أو المشاغل اللي وراهم، ولو هيفليرتوا بالكتابة أو الشات بيبقى عشان الاسترخاء والتحكم، والستات قالوا إنهم بيفضلوا الحالتين بس عشان الانبساط، وفيه فرق كمان بين الستات والرجالة إن الرجالة بتحب تقول كلام واقعي في حين إن الستات بتقول كلام عاطفي.

من مميزات الفليرتينج اللي عن طريق الكتابة أو الشات إنه بيتيح الفرصة للشخص إنه ينقي كلامه بدقه جدا لإنه بيفكر في اللي بيكتبه قبل ما يبعته، لكن برضه فيه مشكلة تانية بسبب الكتابة وهي إن الكلام اللي عن طريق الكتابة احتمال مايوصلش بنفس المعني اللي الشخص عايز يقوله.

Comments: