٦ أنواع للصداقات.. مفيش حد مفروض يعمل كل حاجة!

21/08/2019

بعد سن معين، بتكتشف إن مفيش "كليشيه" جه من فراغ، كل جملة روتينية ومكررة بتودينا لحقيقة إنسانية قدرت تثبت نفسها وتصمد على مر الوقت، من أهم الحقايق دي هي قيمة الصديق، وفايدته في كل وقت ومكان، يمكن تشابكات الحياة بتبعد ناس عن بعضها، وبتقربهم لناس جدد، أو بتخليهم لوحدهم، من ناحية تانية الحياة العصرية ودخول التكنولوجيا طرح أنواع جديدة للصداقات والعلاقات الإنسانية، وأعاد تشكيل بعض من القديم، كل التوترات دي بتسبب أحيانًا تشوش أو تشكيك من ناس لأصدقائهم ولجدوى وجودهم، عشان كده جمعنا أنواع الأصدقاء العادي وجودهم في حياتك، عشان نساعدك تتصالح مع إن مفيش صديق يقدر يقدملك كل حاجة أو مطلوب منه يلبي كل احتياجاتك الإنسانية والاجتماعية.

1- صديق الطفولة

صاحبك اللي متربي معاك، سواء في المدرسة أو في الجيرة والمنطقة، دول اللي ممكن الحياة وتفاصيلها تفرق بينكوا، وكل واحد ياخد طريق، واحتمال في وقت ما تتقبلهمش لأنهم مختلفين عنك، لكن بعد شوية نضج هتلاقي نفسك حابب تقعد معاهم لأنهم مصدر أمان، ولأنك النضج إنك تفرق بين الامتنان لهم ولذكرياتك معاهم ووجودهم، وبين اختلاف الاهتمامات والسلوك.

2- رفيق المشاوير اليومية

كل فترة ومرحلة بيكون لها أبطالها، وفيه ناس ممكن تقرب منك في وقت، لكن مش معناه إنه صديق العمر أو الأقرب ليك أو اللي هيستحملك في المواقف الصعبة، بيكون بس حد بتقدر تخرج معاه تخلص مشاويرك اليومية، أو على الخط مع بعض طول الوقت ففي إمكانية لتنسيق المواعيد بينكوا، تقدروا تحضروا إيفنت، أو تروحوا لأي مكان.

3- صديق الشغل

في كل مكان شغل بتروحه، بيكون فيه حد أقربلك من الباقيين، بتجمع بينكوا الأحاديث اليومية، مشاكل الشغل، حس دعابة مشترك، مشوار واحد وقت المرواح، الشخص ده ممكن تحكيله كل حاجة عن حياتك، وممكن ما تحكيش حاجة خالص، في كل الحالات ده ما يقللش من قيمة وجود شخص زيه في حياتك يخفف عليك عبء وضغط يومك وروتينه.

4- صديق السوشيال ميديا

مش شرط تكون اتعرفت عليه عن طريق أي وسيلة من وسايل التواصل الاجتماعي، لكن ممكن تكون قابلته مرة عابرة في حياتك، وبقة كل الصلة بينكوا هي "فيسبوك" أو "تويتر" أو غيره، ميزة السوشيال ميديا إنها ممكن تجمع بينك وبين الشخص الأمثل في فهمه لأرائك أو اهتماماتك، واشتراكه معاك فيها، ممكن بسهولة تلاقي "حزبك" حتى لو ما اشتركتش معاهم في تفاصيل إنسانية أو يومية، وده نوع من الصداقة ضروري وجوده لأنه بيحسسك إنك مش لوحدك وإنك متزن ولاقي نفسك.

5- معارف بدرجة أصدقاء

عارف الشخص اللي مش بتشوفه غير كل فين وفين لكن "بترتاحله"؟ بتقدر تحكي بسلاسة عن تفاصيل حياتك وتاخد رأيه في مشكلة شاغلاك، أو ما تحسش بالوقت أما تقابله، ده شخص يمكن ما تقدرش تقول عليه صديقك لأن ما تعرفهوش بشكل كافي، ما تعرفش سلوكياته، ما تعرفش كتير عن روتين حياته ومبادئها، لكن بيكون فيه رابط ما أحيانًا بيبقى نجدة نفسية ليك، إنك تطلع اللي جواك قدام شخص مفيش قيود على علاقتك بيه أو تاريخ لها.

6- صديق العمر

ده بقى الشخص اللي بالفعل أثبت إن علاقتك بيه غير مشروطة بإنك تبقى رايق أو زعلان، غني أو فقير، بتكلمه كل يوم أو كل شهر، في أزمة أو في فرح، الشخص اللي كان معاك في كل حاجة حقيقية، هو ده اللي ممكن تحس براحة وإنت بتقول إنه صديق العمر.

Comments: