أغنياء التاريخ: 10 شخصيات ثرواتهم أكبر من "بيل جيتس" و"نجيب ساويرس"

21/08/2019

زي ما إحنا عارفين ومتفقين إن الفلوس كل حاجة والفلوس هي سبب السعادة، عشان كده أغلبنا بيتكلم عن السعادة اللي ممكن يبقى عايش فيها "بيل جيتس" أو "وارن بافيت" اللي هما أغنى أشخاص في العالم، بس الحقيقة إنهم أغنى شخصيات حاليا بس، وإن التاريخ مليان بشخصيات كتير كانت أغنى منهم زي الإسكندر الأكبر، وجنكيز خان، والملك سليمان، وكتير من الأباطرة الرومان ، والفراعنة في مصر، بس مفيش رقم فعلي الحقيقية، ووفقا للبحث اللي عمله Business Insider عن ثروات التاريخ اتضح إن بيل جيتس ووارن بافيت فقرا بالنسبة للـ 10 أشخاص اللي هنقولك عليها:

1- كورنيليوس فاندربيلت، 185 مليار دولار:

كان واحد من أشهر رجال الأعمال في أمريكا لدرجة إن هو اللي عمل خطوط السكك الحديد وخطوط الشحن في القرن الـ 19، وفي أكتر السنين نجاحا له كانت ثروته حوالي 185 مليار دولار، وكسب معظم فلوسه خلال توسيع خطوط السكك الحديد في الحروب الأهلية.

2- هنري فورد، 199 مليار دولار:

هو واحد من أبرز رجال الأعمال في أمريكا وثروته الشخصية كانت حوالي 200 مليار دولار، فورد هو مؤسس شركة عربيات "فورد" واللي اتسمت باسمه ده غير إنه كان من أهم الناس في مجالات الصناعة والبيزنس، وحدد مرتبات عالية للموظفين اللي كانوا شغالين معاه أعلى من متوسط الرواتب وقتها، وصنع عربيات مش مكلفة كانت في متناول الناس العاديين.

3- معمر القذافي، 200 مليار دولار:

معمر القذافي كان رئيس ليبيا الأسبق وحكمها لمدة 42 سنة وكون الثروة دي خلال فترة حكمه، القذافي كان حاكم مثير للجدل وتم انتقاده كتير لكن مع ذلك عمل حاجات كتير لبلده زي إنه عمل فيها نهر من صنع الإنسان عشان يزود الأماكن المهجورة بالمياه، وده غالبا كان أكبر مشروع ري في تاريخ البشرية لإنه بيوفر حوالي 6.5 متر مكعب يوميا بمياه الشرب.

4- وليام الفاتح الأول، 209-229 مليار دولار:

كان ملك إنجلترا أول ملك لإنجلترا بعد غزو نورمان سنة 1066، ثروته تقريبا كانت حوالي من 209 لـ 229 مليار دولار، كان لحكمه عواقب بشعة على البلد، هو اللي أسس مملكة بريطانيا، وأنشأ الجيش والأسطول وبدأ في صنع حصون من الأحجار.

5- جاكوب فوغر ، 221 مليار دولار:

ممكن يبقى مش مشهور زي بقيت الناس اللي بنتكلم عنهم بس ثروتهم كانت ماتقلش عنهم حاجة، كانت ثروته حوالي 221 مليار دولار بفضل مهاراته التجارية والمصرفية، وكون ثروته عن طريق إنه باع سجاد في إيطاليا واستخرج دهب وفضة من المجر وبوهيميا.

6- مير عثمان علي خان ، 230 مليار دولار:

ممكن تبقى ماسمعتش عنه قبل كده بس هو واحد من أكتر الناس الأغنية اللي عاشوا على الأرض، كان حاكم لولاية حيدر أباد في الهند حقق ثروة حوالي 230 مليار دولار، بعد وفاة أبوه سنة 1911 بقى هو الحاكم لمدة 37 سنة، وساعد في تطوير السكة الحديد والتعليم والكهربا في المنطقة.

7- نيكولاس ألكسندروفيتش ، تسيساريفيتش من روسيا ، 300 مليار دولار:

كون ثروته من الأراضي اللي كان بيملكها وأصل فلوسه في الصناعة والتجارة، ولإن الكنيسة الأرثوذكسية الروسية اعتمدته كراهب فنقدر نقول عليه "أغني قديس في التاريخ".

8- أندرو كارنيجي ، 310 مليار دولار:

كان رجل أعمال غني وقوي بشكل مايتصدقش، وبقى مشهور في نص القرن الـ 19، اتولد في اسكوتلندا في عيلة فقيرة جدا سنة 1840 بس اتنقل مع أهله لأمريكا، وبعد شوية استثمارات له في سلسلة شركات لحد ما عمل شركته الخاصة وده كان السبب اللي خلى ثروته توصل لـ 310 مليار دولار، وبيقال برضه إنه صرف معظم ثروته دي على تبرعات وأعمال خيرية.

9- جون روكفلر ، 340 مليار دولار:

لحد دلوقتي اسم جون روكفلر من أهم الأسماء في أمريكا وثروته كانت 340 مليار دولار ولحد دلوقتي هي أكبر ثروة أصلا، اتولد سنة 1839 في نيويورك وبقى واحد من مؤسسين شركة ستاندرد أويل وأسس جامعتين وهما جامعة شيكاغو ، وجامعة روكفلر واتوفى سنة 1937 وكان عمره 97 سنة.

10-  مانسا موسى ، 400 مليار دولار:

أغني شخص 

عاش على الكوكب ده كان مانسا موسى اللي ثروته كانت حوالي 400 مليار دولار، لما كان إمبراطور مالي، اتولد سنة 1228 وكان مسلم متدين وبنى مساجد ومراكز تعليمية كتير في جميع أنحاء أفريقيا.

عشان المقارنة بس أغنى شخص في العالم دلوقتي هو مؤسس أمازون وثروته حوالي 131 مليار دولار، وبيل جيتس تاني أغنى شخص في العالم وثروته حوالي 96.5 مليار دولار.

Comments: