٥ مراحل في دورة حياة العلاقات اللي بتمر بيها مع أي شخص

21/08/2019

أي حد بيبقى داخل علاقة جد مع شخص مقتنع به بنسبة كبيرة بيبقى عايز يكمل مع الشخص ده عمره كله، ويعيشوا مع بعض حتى تحترق النجوم وحتى تفنى العوالم والكلام الجميل والذي منه، بس العلاقات عموما مابتدومش عشان الرغبة في إنها تدوم، فهتلاقي إن أغلب العلاقات بتاخد "كيرف" كده بتاع صحاب بعدين صحاب قريبين، بعدين نتكلم دايما، بعدين نتعود على بعض، بعدين نتصاحب، بعدين "الكيرف" بيطلع أو بينزل.

هنقولك في 5 خطوات إيه هي دايرة العلاقات العاطفية في حياتنا وهي:

1- التعارف: هي مرحلة إن الشخصين بيتعرفوا على بعض ويبدأوا ينبهروا وغالبا الخطوة دي هي اللي بتحدد إنت عايز تكمل مع الشخص على طول في علاقة بجد ولا تقضي وقت لطيف وتمشي، وهي نفس الفترة اللي ممكن يبقى فيها وعود حلوة وتصورات لحياة خيالية زي القصص.

2- البدايات: هي غالبا أحلى فترة في العلاقة، اللي بيكون فيها كلام حلو ومجاملات من الطرفين لبعض، خروج بقى و"دايتس" واللي بيحصل إن الطرفين فعلا بيبدأوا يحبوا بعض واللي غالبا برضه الشخص بيدمن فيها العلاقة دي.

3- الضغوط الداخلية: بمجرد ما الفترة بتاعة البدايات دي تخلص الحياة بتبقى روتينية ومملة، واللي بيخلي فيه ضغط داخلي هو إنك بتبقى دخلت في "كوميتمينت" اتعودت على الشخص وعلى العلاقة ووفية إلزام من الشخصين ببعض، وبمجرد ما الشخص بيدرك ده بيتضايق.

4- الضغوط الخارجية: وهي الفترة بقى اللي كل شخص بيحاول يغير فيها الطرف التاني للشخص المثالي اللي عايزه، وهنا بقي بتبدأ مرحلة الخناقات والعكننة والسلوك العدواني، أو بيبقى فيه نوع تاني من المشاكل بسبب ضغط الحياة العادي زي مشاكل الشغل والبيت وغيرهم، وهنا في الفترة دي وبيبقى فيه طرف بيفكر إنه ينسحب من العلاقة دي عشان كان شايف نفسه "برنس" من غير علاقات أصلا.

5- المرحلة دي بقى ملهاش مسمى لإنها قايمة على أساس المرحلة اللي قبلها وعلى طريقة معاملتك مع الموقف والعلاقة اللي بتحدد طريق من الطريقين اللي هتمشي فيه العلاقة وهما:

هتتخطى المشاكل دي إنت وشريكك وهتعلوا بالعلاقة لمرحلة إنكوا عايزين تعيشوا سوا ومع بعض وهتدخلوا في مراحل تانية زي الالتزام اللي بجد بقى اللي هو هتأسس حياة مع حد وبيت وأطفال وحياة وهتبني وتهيأ حياتك إنك تعيش معاه طول عمرك وتبقى زي القصص الخيالية فعلا وتعيشوا في تبات ونبات وتخلفوا صبيان وبنات.

أو الطريق التاني وهو إنك ماتقدرش تتخطى المشاكل دي، فالمشاكل تكبر وتدخلوا في فترة النهايات ونكدها ووجع الفراق وأعراض الانسحاب وكل واحد على حسب نفسيته بقى وقد ما يستحمل، ومع الوقت هتتخطى العلاقة كلها وهتحس إنك أحسن وهتلبس في شخص تاني وهتعيد نفس الخطوات دي كلها مع شخص تاني ودوخيني يا لمونة دوخيني.

Comments: