إيه حكاية حرائق غابات الأمازون: 9 آلاف حريق في 3 أيام

22/08/2019

رصدت الأقمار الصناعية حرايق ضخمة بدأت في غابات الأمازون في الأيام الأخيرة، وصل عددها بس من يوم التلات 20 أغسطس لـ 9500 حريق وفقًا لإحصائيات مركز الأبحاث الفضائيّة في البرازيل، عشان يكون مجمل عدد الحرايق السنة دي 72 ألف حريق، بزيادة 83% عن نسبة الحرايق السنة اللي فاتت في نفس الوقت.

- ليه الموضوع مهم بالنسبة لنا؟

غابات الأمازون بتسمى بـ "رئة الأرض" لأنها بتساهم في تكوين 20% من الأكسجين على سطح الأرض، بالإضافة لاحتواءها على خمس مصادر المياه العذبة في العالم، وده بجانب اللي بتحتويه من حيوانات وحشرات ونباتات وأخشاب بأنواعها المختلفة.

- إيه هي حرايق الغابات؟

ظاهرة بتحصل في الغابات عادة لأن أقل اشتعال ممكن يتصاعد سريعًا بسبب وجود الخشب وأوراق الشجر، وممكن يبقى السبب طبيعي زي البرق والعواصف، أو بشري بسبب إن حد رمى حاجة قابلة للاشتعال حتى لو كانت سجارة والعة.

الحرايق بتسبب خساير كبيرة سواء في الضحايا من البشر المحيطين بمكان الحريق، أو الحيوانات والنباتات، لكن على جانب تاني بيكون لها فوايد وهي إن التخلص من الأشجار والنباتات الضخمة المتشابكة اللي بتحجب ضوء الشمس عن النبات والحيوان على الأرض.

- إيه سبب الحريق المرة دي؟

حسب تصريحات رئيس البرازيل جير بولسونار قال إنه بيتهم المنظمات البيئية بإشعال الحريق لإحراج الحكومة بعد رفضه تمويلهم، ومن ناحية تانية قال إن ده الوقت اللي المزراعين بيولعوا فيها النار عشان ينضفوا أراضيهم الزراعية.

- ليه فيه غضب؟

فيه هجوم كبير على الحكومة البرازيلية بسبب فشلها في احتواء الموقف والسيطرة على الحريق، على جانب تاني في انتقاد واسع للتجاهل الإعلامي الواضح للحدث، وده اللي خلى الحدث تريند حاليًا على "تويتر" عليه أكتر من 3 مليون تويتة، منهم تويتات مشاهير زي الفنان ليوناردو ديكابريو اللي قال "مرعب التفكير في إن أكبر غابات الكوكب، واللي بتمدنا بأكتر من 20% من الأكسجين، فعليًا رئة الأرض، بتتحرق خلال الـ 16 يوم اللي فاتوا، حرفيًا بدون أي تغطية إعلامية! ليه؟".

Comments: