خناقة بعد تنمر ريهام سعيد على مرضى السمنة: لازم يعرفوا إن شكلهم وحش

23/08/2019

انتشر فيديو للإعلامية ريهام سعيد لحلقة في برنامجها "صبايا" على قناة الحياة اللي هاجمت فيه الأشخاص أصحاب الوزن الزايد، واللي وصفتهم بالناس التخينة واتكلمت عليهم بطريقة أشبه بالتنمر عليهم وقالت "الناس التخينة، ميتة، عبء، عبء على أهلها وعبء على الدولة، وبيشوهوا المنظر، يعني إنتي وإنتي ماشيه كده بالإسدال أو بالعباية أو بالجلابية ومش قادرة تمشي وبتعرجي عشان ركبك وجعاكي وطبعا بيبقى كلك عرقانة عشان عندك كمية سموم غير طبيعية، فقدتي كل أنوثتك، فقدتي ضحكتك، فقدتي كل حاجة".

وبعدها هاجمها عدد كبير من الناس على السوشيال ميديا لإنهم اعتبروا الكلام إهانة ليهم وشكل من أشكال التنمر، وهاجمتها كمان الفنانة إنجي وجدان وعارضتها عن طريق فيديو ليها على صفحتها الشخصية على إنستجرام وقالت في الفيديو "أستاذة ريهام حضرتك كنتي عيانة أو عيانة أو معرفش، أنا واحدة تخينة ومعنديش كل المشاكل دي وغيري كتير، وكنت متعاطفة معاكي جدا لما أعلنتي إصابتك بمرض نادر، وكنت بدعيلك، وناس كتير كانت ضدك وبقت بتدعيلك لما أعلنتي مرضك، فمش من صالحك إنك تضايقي الناس وتغلطي فيهم وتغلطي في شكلهم، أنا رياضية طول عمري، وتخنت، واتجوزت وجوزي رفيع وأعجب بيا رغم أني تخينة، وخلي بالك في ناس مريضة وتخنت وفي ناس عندها مشكلة في الغدد، وفي ناس تخان ورياضيين وممكن يكونوا أحسن منك في الجيم، ومش من حقك تقولي التخان ميتين، أنا أهو عايشة وبمثل وبدي للناس أمل مش بكأبهُم، ودور الإنسان إنه يدي للناس أمل، لكن لما تقولي لشخص تخين أنه ميت فأنتي كده بتقضي عليه تمامًا".

وخرجت ريهام سعيد بفيديو جديد النهاردة الجمعة على الأكونت الشخصي بتاعها على انستجرام وقالت فيه للناس "الأيام دي بتفكرني بأي فترة نعمل فيها حلقات قوية، وأنا مبسوطة جدًا إننا غايظين ناس كتير.. عملنا جراحات سمنة لناس كتير الأسبوع الماضي والستات كلهم زي الفل وصحتهم كويسة".

وقالت كمان  "عارفة إن فيه دكاترة اتضايقت وناس تانية اتضايقت والنجاح بيضايق أنا عارفة، وللمرة الأخيرة لجمهوري اللي بيحيني، إحنا مجرحناش حد ولا اتكلمنا وحش على حد، الناس اللي اتكلمنا عنهم فوق الـ 200 كيلو وعما عبء على الدولة فعلاً لأنهم مبيشتغلوش، والسمنة لو معندكش مشاكل في الغدد أو الجينات أنت اللي جبته لنفسك ويمكن تغيره، الناس اللي لابسة جلابية واسدال ناس بسيطة هنقول جزء منهم أمي لازم تكلمهم بطريقة مختلفة غير اللي الناس بتقوله علشان يفوقوا.. لازم الناس تعرف إن شكلها وحش ومنظرها مش لطيف ويدل على عدم التحضر".





 

Comments: