لينا الفيشاوي: بابا قال إنه مش عايزني تاني في حياته

25/08/2019

من أسبوع تقريبا صدر حكم على الفنان أحمد الفيشاوي بالحبس لمدة شهر عشان امتناعه عن سداد نفقة بنته لينا الفيشاوي، وده كان بعد وفاة والده الفنان فاروق الفشاوي، واللي أعلنت وقتها بنته لينا إنها مش هتقدر ترجع لمصر، وده بسبب إن والدها خد حكم من المحكمة بمنعها من السفر تاني لإنجلترا.

ومن هنا نشرت لينا الفيشاوي فيديو ليها وعرفت نفسها في أول الفيديو وقالت إنها بتعمل الفيديو ده عشان حكم الحبس اللي على والدها، و إن والدها قالها إنه مش عايزها في حياته تاني وإنها كانت بتلجأ في الأزمات اللي زي دي لجدها لكن دلوقتي مابقيتش عارفة تلجأ لمين، وقالت كمان في أول الفيديو إنها شافت والدها لأول مرة في حياتها لما كان عمرها 3 سنين، وإنها مش فاكرة التفاصيل بالظبط بس فاكرها إن كان فيه أزمات بينه وبين مامتها بسببها وبسبب المصاريف.

 وقالت إن مامتها كانت عايزة تعمل دراسة الدكتوراه بتاعتها في لندن من 3 سنين وكانت عايزه تاخدها معاها، ووافق والدها بس بشرط إن هو اللي يختار المدرسة اللي هتدرس فيها، وتكفل بمصاريفها لمدة شهرين وبعد كده قرر إنه مايدفعش مصاريف ليها تاني.

وقالت في باقي الفيديو إن الحياة في بريطانيا صعبة ومكلفة، وبعد ما اتفق مع مامتها على مصاريف معينة اتفاجئت إنه مابيدفعهاش واتفاجئت بصدور حكم ضده، وفي آخر حوار دار بينها وبين والدها كان عصبي جدا وقالها إنه مش عايزها في حياته تاني وده اتسبب لها في صدمة، لإنه مابيهتمش لا بحياتها ولا بتعليمها، ومكنش حد مهتم في عيلة الفيشاوي بيها غير جدها الراحل فاروق الفيشاوي.

Comments: