١٠ حاجات الأمهات كان معاهم حق فيها

26/08/2019

الجيل الأكتر انتشار وتأثير على وسايل التواصل الاجتماعي، هو جيل التسعينات والتمانينات، اللي هما دلوقتي في مرحلة العشرينات والتلاتينات من عمرهم، عشان كده أصبح فيه كثافة في انتشار "كوميكس" بتتريق على اندفاع فترة المراهقة والرغبة في إثبات نفسك وإن رأيك صح، ومقارنتها بدلوقتي وإنت باستمرار عايز حد يساعدك يا اتخاذ قرار، أو ينقذك من حياة الشخص الناضج المسؤول.

الانتشار ده هو أول توثيق إليكتروني للنضج بلغات العصر الحديث بعد ما كان ممكن يتلخص في "زمان وأنا صغير كنت بحلم أبقى كبير" وسهرة مع فيلم "صغيرة على الحب"، ومن أهم اكتشافات المرحلة دي هو إن ماما لما كانت بتقول "لما تكبر هتعرف" كان معاها حق، عشان كده جمعنالك كل حاجات بسيطة أو كبيرة ماما كان فعلًا معاها حق فيها.

1- لو عملت حاجة غلط ما تكدبش أما تتعرف، مفيش حاجة تستحق إنك تتحط في موقف تتشاف فيه كداب.

2- خد دايمًا جاكيت معاك حتى لو مش حاسس إنك سقعان دلوقتي.

3- نوم بالليل مش زي نوم النهار.

4- كُل خضار واشرب لبن.. مفيش أحسن من أكل البيت.

5- ما تشتريش من أول محل تدخله، لف لحد ما تلاقي أفضل حاجة بأفضل سعر.

6- مالكش إلا اخواتك في الآخر.

7- الجزمة المريحة مش خسارة فيها الفلوس.

8- ما تستعجلش على إنك تكبر.. ما تستعجلش إنك تبعد عن البيت، بكره يوحشك.

9- مش هتمشي الدنيا على مزاجك.

10- كل حاجة بتعدي.

Comments: