٧ نصايح عشان يبقى دمك خفيف

27/08/2019

عادة خفة الدم شيء بيبقى معاك من يوم ولادتك زي لونك وملامحك، يعني شيء مش مكتسب، بس بما إن بعض الدراسات بتقول إن الناس اللي عندها كاريزما وخفة دم بيتقبلوا في مقابلات العمل أكتر وممكن يوقعوا قلب الكراش بسهولة، ده غير إن الناس بتحب تقعد معاهم ويتكلموا معاهم ويصاحبوهم، فإحنا جمعنالك بعض النصايح اللي نشرها موقع WikiHow - الله يستره - عشان ماتبقاش لطخ وتبقى أروش واحد في القعدة:

1-اعرف الناس اللي إنت قاعد معاهم كويس قبل ماتهزر قدامهم أو معاهم، لو فهمتهم وفهمت اهتماماتهم والمواضيع اللي بيحبوا يتكلموا فيها هتعرف تلاقي مواضيع تهزر فيها، لأن المواضيع اللي بتهزر فيها مع أصحابك أكيد لو قعدت مع خالاتك وعماتك مش هيضحكوا عليها، ولو رميت إيفيه على سيد عبد الحفيظ مع البنت اللي مرتبط بيها مش هتفهم، ولو فهمت مش هتضحك، ولو ضحكت يبقى بتخونك مع صاحبك.

2-العب بالكلمات ومعانيها، لأن كتير من الضحك بيجي من إنك تقول كلمة قاصد بيها حاجة لكن اللي الناس فهمته حاجة تانية خالص، سواء بقى ده مقصود منك أو مش مقصود، زي ما تقول لحد "أحطهولك فين؟" وإنت يبقى قصدك شاحن الموبايل مش حاجة تانية لا سمح الله! بس مش متأكدين كده هيبقى دمك خفيف ولا هتبقى dirty minded.

3-  استخدم السخرية أو الـ Irony في حكيك للمواضيع، والسخرية معناها مش إنك تسخر من شخص لأ السخرية عامة بتبقى متمحورة عن "مفارقة"، زي إنك تحكي موضوع تافه لكن بطريقة جد أوي، أو إنك تبقى بتتكلم عن حاجة بشكل يخلي الناس تتوقع نهاية معينة وتنهي نهاية غير متوقعة تماماً زي ما محمد هنيدي قال في فيلم (وش إجرام) للبلبة لما سألته إمك ولا رحاب؟ قالها بكل جدية وتأثر "إزاي تسألي سؤال زي ده يا ماما؟" وبعدها جاوب إجابة غير متوقعة وقال طبعاً رحاب.

4- حاجة من الحاجات اللي ممكن تخلي الناس اللي قاعدة معاك تبقى بتضحك على كلامك ومستمتعة بوجودك هي إنك تحكيلهم المواقف المحرجة اللي مريت بيها في حياتك، أنت هنا مش هتبذل مجهود عشان تقول إيفيه أو تعمل حاجة دمها خفيف لأن المواقف لوحدها اللي هتحكيها زي ماحصل هي اللي هتضحكهم والناس دايماً بتضحك على المواقف المحرجة، بس بلاش تحوّر عشان هتتقفش ولا اتقفشت هيفصلوا منك.

5-فيه قاعدة بتقول إن كل ما المكان اللي إنت قاعد فيه ممل، كل ماكان خصبة سهلة إن يبقى دمك خفيف فيه، لأن طبعاً لو مكان مبهج ومليان ناس روشة ممكن تبقى أنت الشيء الممل الوحيد في المكان، عشان كده بيقولوا إن سهل إنك تضحك الناس في مكتب الشغل أكتر من إنك تضحكهم في عرض كوميدي.

6-سف على نفسك بدل ماتسف على حد حواليك، يعني قول للناس علي حاجات إنت مابتحبهاش فيك واتريق عليها، الناس هتضحك لو بتقول حاجات هم قادرين يفهموها خاصة لو مشتركة بينك وبينهم وكمان هتدي انطباع انك متقبل أو مرتاح مع نفسك لدرجة انك معندكش مشكلة من انتقاد نفسك والسخرية عليها كمان

7- خليك واثق في نفسك وفي إنك شخص مش دمه تقيل، وخليك عارف إن مش لازم تبقى خفيف على قلب كل اللي بتقعد معاهم، فيه ناس هتستطلفك وناس هتسترخمك، لأن مفيش حاجة الناس بتجمع إنها بتضحكهم وكل واحد بيضحك على حاجات معينة، وإنت كمان هتبقى مختلف بالطريقة اللي انت هتهزر بيها لأن نظرتك للعالم حواليك بطبيعتك مختلفة عن نظرة باقي الناس اللي حواليك، والكوميديا وطريقة الهزار بتاعتك موجودة إنت اللي محتاج تشتغل عليها وتطلعها!

بعيداً بقا عن نصايح Wikihow وعن الهري ده كله، لو عايز يبقى دمك خفيف من غير النصايح والخطوات دي كلها، تعالى يوم السبت الجاي 31 أغسطس أحضر أول عرض لـ The Glocal Show واتفرج على 6 من أشطر الناس اللي بيعملوا ستاند أب كوميدي في مصر، ومن الضحك اللي هتضحكه هتخرج من العرض دمك خفيف لوحدك مش هتحتاج خطوات، اعرف التفاصيل عن العرض وعن شراء التذاكر من هنا:
https://www.facebook.com/events/2441125906174109/


 

Comments: