٨ نصايح لو إنت مبتدئ في الدخان وعايز تجرب الشيشة

27/08/2019

في سن معين كده، أغلبنا بيبقى عنده الشغف والفضول ناحية إنه يجرب حاجات كتير مختلفة، يجرب سجاير مرة، شيشة مرة، فيه اللي بيعجبه وبيكمل في اللي جربه وفيه اللي مابيعجبهوش أو بيعجبه بس هو قرر يجرب بس فمش هيكمل فيه تاني، مش مهمتنا إننا نقول للناس صح أو غلط ولا تعملوا ده أو ماتعملهوش، بس لو حاسس إنك عايز تجرب، فممكن نقولك شوية نصايح تعملها عشان لو جربت الشيشة بالذات ماتتعبش:

1- أول حاجة وإنت بتختار المكان اللي هتشيش فيه، اختار مكان يكون فيه التهوية كويسة، لإن الشيشة بتحتاج جو بارد مفتوح أو مكان فيه تهوية كويسة، عشان طول ما المكان مكتوم أو مافيهوش تهوية كويسة فإنت كده بتتنفس ثاني أكسيد الكربون، ده غير نسبة الكربون إنت لسه شاددها، فكده الرئة هتطلع من مكانها تشتمك شخصيا وترجع تاني، وبلاش برضه تخلي التكييف أو المروحة في وشك عشان ممكن يجيلك صداع

2- بلاش تعمل فيها هارون الرشيد وتدخن وإنت نايم أو ممدد، عشان أول ما هتقوم تقف هتحس إن العالم بقى عبارة عن مراجيح السبتية وهتدوخ

3- ماتدخنش على معدة فاضية، ولا على معدة مليانة برضه بأكل دسم، بمعنى إن المعدة الفاضية هي لما تبقى ماكلتش بقالك من 4 لـ 6 ساعات عشان ماترجعش وماتصدعش لإن ممكن وقتها ضغطك يوطى، وبرضه لو شيشت بعد أكلة دسمة ممكن تحس بغثيان يعني ده غير إنك مش هتحس بأي مفعول حلو ولا هادي من الدخان

4- بلاش تعمل نفسك شبح وتدخل بقلب جامد على المعسل بأنواعه سواء كان قص أو سلوم لإنهم أتقل أنواع الدخان في الشيشة، ممكن تجرب الشيشة بالفواكه

5- لمعلوماتك برضه، الشيشة التفاح مابتعتبرش من أنواع الشيشية الفواكه لإنها تقيلة، فممكن تجرب الأنواع الهادية زي الليمون نعناع، اللبان، البلوبيري، الكيوي مانجا أو الفانيليا أو الاختراعات الجديدة اللي زي الشيشة نوتيلا

6- اسحب النفس بهدوء، وياريت يكون نفس طويل نوعا ما اهدي شوية مش نفس قصير في نفس قصير، وتطلع النفس بالراحة، ومش لازم من أول مرة تبقى معلم وتطلع من مناخيرك

7- لو مابتحبش فاكهة في الحقيقة بلاش تقول لما أجربها في الشيشة، عشان أكيد لو مابتحبش الكريز في الحقيقة مش هتحبه في الشيشة، وممكن تحس بغثيان بعد كده أو تتعب

8- والنقطة دي زي النقطة اللي فوق شوية في خلط نكهات الشيشة برضه ماتعكش لو ماتقدرش تاكل البرتقان على الفانيلا بلاش تعمل كده، فكر قبل ما تقول عايز طعم ايه وياريت عشان انت مبتدأ تبص على نقطة رقم 5 وتختار نكهة منهم.

Comments: