٩ نصايح لجولة صحية في السوبر ماركت: عشان لما تضيع فلوسك أول الشهر

27/08/2019

أول كل شهر أي أسرة مصرية لازم تروح السوبر ماركت وتعمل الشوبينج المتين، أو عموما أي حد بيقبض بينزل نزولة السوبر ماركت والحاجات لوحدها غصب عنه بتبدأ تغريه ويلاقي نفسه دافع ربع المرتب في شوية حاجات من السوبر ماركت ومش مفيدة وبتعمل زيادة في الوزن.

عشان كده خلينا نقولك على شوية حاجات ممكن تجيبها من السوبر ماركت تبقى صحية وفي نفس الوقت تلبي رغبة الشرا اللي عندك وتعمل شوبينج أول الشهر:

1- العيش والمكرونة البني:

العيش الفينو والمخبوزات عموما بتبقى من الدقيق الأبيض، عشان كده من الأفضل إنك تشتري عيش بني أو مكرونة بني أو المعجنات المصنوعة من القمح الكامل، عشان سعراتها الحرارية أقل وليها دور مهم في الوقاية من مشاكل الهضم.

2- الشوفان:

لو الكورن فليكس والحاجات دي بتغريك حاول تغيرها بالشوفان، لإن الشوفان فيه ألياف وسكر قليل، وحاليا بقي فيه أنواع كتير من الشوفان وحبوب الشوفان زي الجرانولا مثلا حبوب شوفان وفيها فاكهة، ولو هتفطر بيها ممكن تضيف لها لبن أو زبادي وده هيبقى أكل صحي جدا ليك.

3- الزبادي:

زي ما قولنا إن ممكن الشوفان هيحتاج زبادي، بس الزبادي نفسها أكلة مفيدة وغنية بالكالسيوم ده غير إنها مفيدة للجهاز الهضمي، وياريت لو تختارها زبادي سادة من غير إضافات زي السكر والفواكه، لإن بيبقى فيها كمية كبيرة من السعرات الحرارية.

4- الشوكولاتة الداكنة:

الشوكولاتة الداكنة أو الدارك تشوكليت فيها مضادات للالتهابات ومضادات للأكسدة، وبتحمي الشخص من أمراض القلب والسكر والزهايمر والسرطان، عشان كده روق على نفسك واشتري شوكولاتة عادي بس خليها دارك عشان صحية أكتر من أي نوع شوكولاتة تانية.

5- أسماك:

من الحاجات المهمة برضه لجسمنا اللي المفروض تاكلها السالمون والتونة والسردين لإنها غنية بأوميجا 3 وعناصر غذائية تانية لازمة للجسم 

6- البيض:

البيض عنصر مهم جدا لجسمنا عشان غني بالبروتين والزنك والفيتامين سواء كان أحمر أو أبيض، بلدي أو مزارع.

 7- شاي أخضر:

زي ما إحنا عارفين إن الشاي الأخضر بيساعد على حرق الدهون والوقاية من السرطان وتحسين وظايف المخ وغيره من وظايف صحية مفيدة، عشان كده خليك فاكر إنك لازم تشتريه في طلعة أول الشهر

8- فاكهة وخضار:

طبعا الفاكهة والخضار أي حد بيفضل يشتريهم طازة أحسن، بس هما مفيدين جدا لإنهم بيحتوا على ألياف وفيتامينات ومعادن لازمة للجسم، ده غير إنهم بيساعدوا الشخص على الوقاية من الأمراض.

9- المكسرات:

لو هتشتري مكسرات الأحسن إنك تشتريها مش مملحة لإنها بتساعد على خفض مستوى الكوليسترول وبيحسنوا صحة الأوعية الدموية، فأحسن المكسرات اللي ممكن تشتريها هما عين الجمل والكاجو والفسدق.

Comments: