الاهتمام بيتطلب.. 7 طرق تقول بيهم لشريكك إنك محتاج اهتمام

27/08/2019

في بداية كل علاقة كل حاجة بتمشي بسهولة ومن غير ما تطلب اهتمام من شريكك ومن غير ما شريكك يطلب منك اهتمام، الدنيا بتبقى متظبطة وفي أبهى حالاتها، وغالبا بتنسى إن العلاقة ممكن توصل في وقت ما للي هي عليه في نص العلاقة، ومن أهم المشاكل اللي أغلب الناس بتقع فيها أثناء العلاقة هي قلة الاهتمام وطبعا الطرف التاني مابيطلبش الاهتمام عشان زي ما المقولة الشعبية بتقول "الاهتمام مابيطلبش"، بس المفاجأة بقى إن الاهتمام بيطلب.

ممكن تطلب الاهتمام بقى بطريقة غير مباشرة بالخطوات دي:

1- إدي لشريك اهتمام هو كمان:

العلاقات في المطلق أخد وعطا، عشان كده ماينفعش تطلب الاهتمام من حد وإنت مابتسمعش حتى هو بيقول إيه، المساواة عموما في العلاقات كمان صحية جدا عشان كده لو عايز اهتمام شرط تقدم الأول.

2- خطط لخروجة أو "دايت":

لو عدى وقت كتير ماخرجتوش فيه، ظبط خروجة رومانسية، ووضح له إن كان بقالكوا ماخرجتوش خروجة زي دي عشان هو ماكنش مهتم بيك.

3- قوله مجاملات عاطفية:

لما شريكك يديلك الاهتمام حاول تقوله كلام لطيف بعدها، وبالطريقة دي ممكن تبين له قد إيه الكلام أو الأفعال دي مهمة وإنك مش عايزة يبطل، فهو هيحس بالتقدير وهيكرر الفعل أو الكلام تاني.

4- ماتشكش في مشاعرك:

ماتشكش إنك عايز اهتمام فعلا من شريكك عشان أكيد طالما إنت محتاج لده يبقى إنت حاسس بنقص فيه، لكن إنت مش عايز تبين ده عشان ماتحسش إنك محرج، لكن ماتقلقش ده حقك أصلا إنك تطلب الاهتمام من شريكك.

5- اطلب المساعدة:

واحدة من الطرق اللي بتخلي شريكك يعرف إنك عايز اهتمام هو إنك تطلب المساعدة أو تطلب الاهتمام عادي، فممكن عادي تطلب منه إنه ييجي معاك مشوار أو يساعدك في حاجة بتعملها أو يقعد معاك في اللاشيء.

6- إديله وقت:

بعد ما تطلب الاهتمام بكل الطرق ماتتوقعش إنك تلاقي الاهتمام على طول عشان إحنا بني آدمين ومش بزراير، عشان كده استني وقت بعد ما تطلب.

7- عبر عن ساعدتك:

عرفه إنك مبسوط من الاهتمام اللي خدته وعايز اهتمام أكتر

Comments: