جمل حب خالدة من السينما والمسرحيات المصرية

28/08/2019

كتبت: نوران عاطف

كل الناس تقريبًا بتحس بنفس المشاعر، بتمر بنفس المواقف، وبيختلفوا في تعبيرهم عنهم وتعاملهم معاه، والفنان بيتميز عن أي حد بقدرته على التعبير، وعمل تكوينات لغوية وصور مبتكرة، توصف الموقف أو المشاعر بشكل ما يقدرش يعمله الشخص العادي، وجمعنا هنا على سبيل المثال وليس الحصر، عدد من جمل الحب الخارجة عن المألوف في الأفلام والدراما المصرية.

(1)

"انا حبيت كل حاجه إنتي بتحبيها، حبيت أبوكي وحبيت أمك حتي جاموستك حبيتها"

يحيى الفخراني لـ ليلى علوي- خرج ولم يعد (1984)

(2)

"كل اللي عايزه دلوقتي إن المسافة بينا تصغر، نفسي أسلم عليكي، ألمسك.. السجن بقى من غيرك سجن يا فايزة."

عادل إمام لـ سعاد حسني- حب في الزنزانة (1983)

(3)

"أختي العزيزة ذات المنديل الأخضر 

أهديكي أرق التحيات

أحب أعرفك بنفسي، أنا صلاح الغرباوي، دبلوم صنايع، و شاطر جدا في الخراطة، لكن مكسبي كان مكفيني بالعافية..خصوصا و أنا عندي أحلام كبيرة، فدخلت السجن عشان أبني مستقبلي و أكون نفسي

بصراحة أنا كنت مهموم و حزين بس راحت همومي لما شوفتك و شفت اللون الأخضر بين إيديكي...ربنا يجعل سنينك كلها خضراء

و ختاما، أتمنى لكي السعادة و راحة البال

المخلص ليكي

صلاح"

جواب عادل إمام لـ سعاد حسني- حب في الزنزانة (1983)

(4)

- اتشعلقت بيها يا ماهر؟

- وأنا معاها كنت متكيف ع الآخر يا سيدة.. أكني ضارب شارع بحاله ومقفله.

- يبقى بتحبها يا بطل!

نعيمة الصغير لـ عادل إمام- المشبوه (1981)

(5)

- وعترتي فيا إزاي؟ دي الحكومة نفسها ماعرفتش تلاقيني!

- ما هي الحكومة لو عندها قلب زي قلبي كانت بعد الشر عترت فيك.

عادل إمام لـ سعاد حسني- المشبوه (1981)

(6)

- أنا بنزل مترو الأنفاق مخصوص علشانك، بحب صوتك وشكلك وحركاتك.. ده أنا بقالي سنة بحلم بيك.

- بتحلمي بيا أنا؟

ـ مرة بتغنيلي، ومرة حاببني، ومرة بتتخانق معايا، ومرة بتقل أدبك معايا.

- اتجوزنى يا زين بالله عليك!

-عشان ايه؟!

- عشانى، عشان بحبك اتجوزنى وانا عمرى ما هنسالك الجميل ده.

-- بقولك إيه، إذا مابطلتيش بقى أمور الهبل دي أنا هضربك!

- طب ما أنا هسيبك تضربني.

عبلة كامل لـ أحمد زكي- هيستريا (1998)

(7)

"لازم تركع هنا قدامي وتقول بالذوق أو بالعافية إنها واقعة كمان في غرامي!

ده أنا يمكن أقولهالها الأول ولا أجيبهالها على بلاطة.. أركع قدامها أستعطفها.. إنما إيه بوقار.. بألاطة

ما هو أصل يعني بجد بجد فيه سر لسة ما عرفوش حد.. وحشتّني أوي أوي.. وحشتّني جدًا أوي خالص.

فؤاد المهندس لنفسه- سيدتي الجميلة (1969)

(8)

-        ربنا يسامحها

-        ويسامحني أنا كمان

-        يسامحك إنت كمان ليه يا أسطى؟

-        عشان هرتكب ذنب كبير.. شر لا بد منه.. هضحي بسعادتي وراحتي ومستقبلي.. هدفن نبوغي وعبقريتي بالحياة!

-        هتعمل إيه يا أسطى؟

-        ها..

-        هتسرق؟

-        ياريت

-        هتقتل؟

-        ياريت!

-        هتنتحر؟

-        ياريت!!

-        أمال هتعملي إيه؟

-        هتجوز..

-        يا خرابي! يا لهول تلك الصاعقة!

-        هتتجوز مين يا اسطى؟

-        اللي ما تتسمى.. اللي اسمها مقسوم اتنين.. تر

-        تر!!! حسب الله.. حسبولة.. حسبولي.. إيه اللي خبطك في نافوخك مرة واحدة؟

-        لقيت فيكي الإنسانية والذوق والتضحية.. اكتشفت فيكي جمال كان مستخبي ورا لسانك اللي عامل زي المبرد.. جمال الروح.. أنا هتجوزك.. هتجوزك وأنا مغمض العين، مسدود الأنف والأذن والحنجرة والله معي!

-        رد قلبي!!!

عبد السلام النابلسي لـ زينات صدقي- شارع الحب (1958)

(9)

- أبو سريع.. أبو سريع

- فيفي؟! إزيك يا فيفي؟

- إن شالله تسلم.. إزاي حسونة وأهل الحتة؟

- مشتاقين أوي.. الحتة كلها بتسأل عليكي يا فيفي!

- سألت عليك العافية.. قولي يا أبو سريع.. ياترى الناس بتقول عليا إيه؟

- فرحانينلك أوي وبيقولوا الحمدلله ارتاحت من الشغل والقرف اللي إحنا فيه.. سلامات يا فيفي!

- إن شالله تسلم يا أبو سريع

- والله احلويتي واتدورتي.. وعيونك بقة زي عيون البقر

- يا راجل اختشي!

- وبوقك..

- قصر لسانك لاحسن ادلق عليك مية وسخة

- خلخال سليمان!

- أبو سريع.. ما تقوليش كده أحسن أنا بتكسف!

- فيفي.. عاوز منك خدمة صغيرة

- رقبتي سدادة

- اديكي فهمتي

- مراتك بردو؟

- الله يخربيتها.. عايزة 6 جنيه

...........

- ما أنا خايفة أديلك فلوس تروح تسكر بيها عند كوستا

- ابقى ادبحيني.. عيب يا فيفي.. هو أنا كنت بروح عند كوستا إلا عشان اخدك معايا.. كنتِ لوحدك وأنا لوحدي.. واحنا الاتنين لا لينا أخ ولا صاحب.. الدنيا ضلمت من بعدك يا فيفي.. بيقولوا الشريك المخالف ولا الوحدة.. اسأليني عايش إزاي من بعد الفراق.

- ما أمر الفراق يا أبو سريييع!!!

إسماعيل ياسين لـ رياض القصبجي- الأنسة حنفي (1954)

(10)

-        هتغيب كتير يا ابن حميدو؟

-        والله إذا كان حظي كويس هغيب 15 سنة.. ما تقلقيش يا حميدة إذا غبت.. ما تخافيش جايلك!

-        ما تعرفش تهرب يا ابن حميدو؟

-        اهرب! يا نهار أسود! عيب يا حميدة أنا راجل مواطن شريف.. وشرفك عندي أنا مواطن شريف.

-        الوداع يا مواطن.. جود باي يا شريف

-        باي.. مع السلامة يا حميدة.

زينات صدقي لـ إسماعيل ياسين- ابن حميدو(1957)


 

Comments: