١٠ حاجات مريبة بتعملها بعد "البريك أب"

29/08/2019

نهايات العلاقات دايمًا بتكون مرحلة موترة وصعبة، مهما كنت مقتنع بقرارك أو شايفه صح، البعد عن شخص ارتبطت بيه عاطفيًا، وروتين يومك وعاداتك وخططك وأفكارك هي كمان ارتبطت بيه، بيخلي البُعد مؤلم وتقيل، زي ما يكون ضربة على دماغك بتخليك مش متزن وبتتصرف بشكل مش محسوب، وهنا هنجمعلك أهم التصرفات دي زي ما قدمها موقع "Bolde" لأن العلاج بيبدأ بالإدراك.

1- متابعة حسابات "الإكس" على السوشيال ميديا

لو إنت من متابعين "فريندز" ممكن تفتكر مشهد "مونيكا" بعد ما سابت "ريتشارد" وقعدت وقت طويل مش قادرة تنام، لحد ما جالها باباها وقالها إن "ريتشارد" كمان حالته مزرية وإن عمره ما شافه في حالة سيئة زي دي قبل كده، وده خلاها تنام قبل ما باباها يخلص كلامه!

من نفس المنطق بيبدأ بعد الانفصال رغبة جنونية في معرفة أخبار شريكك السابق وبتحقق ده من خلال متابعة مستمرة للـ "فيسبوك"، "الإنستجرام"..إلخ.

2- تسأل أصحابكوا المشتركين عنه

لنفس الأسباب السابقة بتلاقي نفسك طول الوقت عايز شخص يقولك بالتفصيل هو بيعمل إيه؟ بيفكر في إيه؟ زعلان ولالا؟ بيفكر يرجع ولالا؟

3- التفكير في الانتقام

بشكل أو بآخر بيبقى عندك رغبة في إثبات حاجة للطرف التاني، إن إنت أفضل، إن إنت كويس، إن إنت ناجح..إلخ، في بعض الحالات ممكن كمان تفكر في أشياء مؤذية أكتر، وكل ده بيفضل في الآخر بردو هوس بالقصة ومش طريق صحي عشان تطلع منها.

4- تحكي تفاصيل حياتك لناس ما تعرفكش أوي

الفضفضة ضرورية ومريحة، بس من الحاجات المريبة في الوقت ده إنك بتبقى حاسس إنك عايز تتكلم على طول، وقصتك مسيطرة عليك لدرجة إنك ممكن تقولها أو تشير ليها مع ناس مش مهتمة كفاية أو مش قريبين عشان يسمعوا عن مشاعرك وحياتك الشخصية، في الفترة دي حاول تلجأ أفضل لدكتور نفسي.

5- ما تقبلش الرفض

- خليك معايا

- لا مش عايز

- ليه؟

- عشان "مش عايز"، "مش نافع"، "مش مرتاح"..إلخ من الإجابات اللي بتقولك إنك لازم توقف المحاولات خلاص، واللي عدم اتزانك وقتها بيخليك ما تدركش ده كفاية وتفضل تحاول، وده مش صح.

6- عمل علاقات مع ناس مش مهتمة

في الوقت ده بيسيطر عليك شوية إنك مش مرغوب، وده ممكن يخليك تحاول تطور علاقتك بناس مش مناسبين ليك عشان تثبت لنفسك إن لسة ليك تأثير ومحبوب.

7- تشم ريحة شريكك السابق في كل حاجة

الروايح من أكتر الحاجات اللي بتأثر في إثارة المشاعر والذكريات، وفي الوقت ده إنت بتبقى حساس لأي حاجة من قريب أو بعيد ريحتها شبه الحد ده.

8- الهوس بكل حاجة عن "الإكس"

كل شارع، صوت، كلمة، أغنية، موقف، شبه حاجة فيه أو حصلت معاه، دايمًا هتأثر فيك وهتتكلم عنها، ويمكن ده طبيعي أول ما تسيب الحد ده، لكن لو طوّل فعلًا بيبان هوس مثير للشفقة لحد مابقاش معاك.

9- تشوف أفلام رومانسية

طبعًا دي الفترة المثالية لأنك تبقى مفرط في الحساسية، تتأثر بكل حاجة، بيبقى جواك مشاعر حاسس إنك عايز تعبر عنها وبتطلعها في إنك تشوفها في فيلم وتتفاعل معاه.

10- تعمل حاجات مجنونة عشان تلفت نظره

ممكن في الوقت ده تعمل حاجة متهورة موجهة له بشكل مباشر زي مفاجآت أو هدايا غالية عشان تصالحه، أو بشكل غير مباشر إنك تعمل نيو لوك رهيب،  تنقل بلد تانية، تحاول تبين دايمًا إن عندك مشكلة معينة كبيرة تخليه يكلمك.

Comments: