١٣ حاجة بيعاني منها أصحاب الصوت العالي كل يوم

29/08/2019

ناس كتير صوتهم عالي بالفطرة، مش قاصدين يزعقوا، مش مضايقين، مش غضبانين، لكن هما كده طبيعتهم كده! بس عشان يعيشوا بيطبيعتهم دي فيه شوية حاجات بتعتبر معاناة يومية بيمروا بيها، جمعناها زي ما قدمها موقع "Bolde".

1- كل يوم من أول ما بدأوا يتكلموا بيتقالهم "وطي صوتك!".

2- الناس بتفتكر إنهم متعصبين وغضبانين كل ما يتكلموا بحماس عن حاجة بيحبوها أو واثقين في معلوماتهم عنها.

3- تون صوتهم العالي بيخلي الناس تفتكرهم متعاليين أو بيدوا أوامر، مهما كان اللي بيقولوه لطيف أو وحش، بيتشاف بنفس الشكل.

4- طول الوقت لازم يقولوا إنهم مش بيزعقوا وإن ده صوتهم الطبيعي.

5- أي حد على مقربة أمتار منك ممكن يسمع بالتفصيل حوارك مع الشخص اللي قاعد جنبك.

6- ما نعرفش حاجة اسمها "وشوشة".. لو عايز تقول سر يستحسن تبقوا لوحدكوا.

7- لما توصل مكان، حتى لو كان حفلة صاخبة لازم كل الناس تعرف إنك وصلت.

8- التعليقات في السينما أو المسرح مستحيلة! كل الناس بتسمعها بوضوح وبيبقى فيه ردود أفعال عنيفة.

9- بيخوفوا الأشخاص الهاديين.. صوتهم وطريقتهم مرعبة بالنسبة لهم.

10- مفيش ضحكة بصوت واطي أو وسط.. يا زي الطبل يا مفيش.

11- ما يعرفوش إيه "الصوت الطبيعي" اللي بتحاولوا تقنعوهم بيه ده.. هي دي نسختهم وفكرتهم عن الصوت الطبيعي.

12- صعب يسمعوا حد بيتكلم بصوت واطي.

13- عشان يوطي صوته ويوشوشك ده مجهود كبير جدًا، فعشان تطلب منه يعيد الكلام تاني، ما تنتظرش منه غير إنه هيعيده بصوته الطبيعي!

Comments: