الحملات الخيرية لـ"Porn Hub": فرجة قصيرة تمنع بلاوي كتيرة

02/09/2019

من سنة 2007 موقع "بورن هاب" بقى من أهم المواقع الإباحية في العالم ومع الوقت طبعا، بقى أشهر وأشهر لدرجة إن في 2014 الموقع عمل إحصائية عن نسبة المشاهدة عليه وكانت أكتر 7.5 مليار مشاهدة في سنة وده رقم خرافي يعني.

سواء اختلافنا أو اتفقنا على المحتوى اللي على الموقع، بس الواقع والحقيقة بيقولوا إن فيه عدد كبير من الناس بيزور الموقع، وده كان السبب اللي خلى المسؤولين على الموقع ده يعملوا موقع تاني اسمه (Pornhub cares) وهو موقع خيري هدفه إنه يجمع التبرعات ويساهم بيها في حل مشاكل إنسانية زي أبحاث سرطان الثدي وسرطان الخصية، وتقديم منح دراسية والحفاظ على البيئة، ومن هنا كانت فكرة آخر حملة للموقع وهي حملة للتبرع للمنظمات المعنية بتنضيف المحيطات من البلاستيك.

الحملة دي بدأت من 27 أغسطس وهتنتهي يوم 27 سبتمبر، هدف الحملة هو توعية الناس عن الاستهلاك الضخم للبلاستيك خصوصا البلاستيك اللي بيتم استخدامه مرة واحدة، وقد إيه إحنا مش مدركين الموضوع هيوصل بينا وبالشواطئ والمحيطات لفين، ده غير كمان إنه البلاستيك بيعرض حياة كائنات بحرية كتير للخطر، وبالتالي قدم الموقع نصيحة للناس وهي إنهم يبطلوا يرموا البلاستيك ويستخدموا بلاستيك بيتم إعادة تدويره ويشتروا بلاستيك بيتم استخدامه أكتر من مرة، وطلبوا من الناس إنهم يتفرجوا على فيديو إباحي بعينه، لإن كل مشاهدة على الفيديو هيتبرعوا قصادها لحملات تنظيف المحيطات من البلاستيك.

حملة البلاستيك مكنتش أول عمل خيري لـ"بورن هاب"، ومن الحملات المشهورة للموقع، حملة توعية عن الخطر اللي بيهددنا عشان موت النحل بسبب المبيدات الحشرية وكان اسمها (Beesexual) وكان وقتها في الفترة بين 15 أبريل لحد 16 مايو، ده غير حملة تالتة للتبرع للطلاب بحوالي 25 ألف دولار عشان يكملوا دراستهم في الجامعة والحملة دي اتجددت أكتر من مرة على الموقع، وكان فيه حملة توعية تانية عن ممارسة الجنس الأمن بعد سن الـ 65.

الموقع عمل حملات تانية تبرع لمرضى سرطان الثدي وتوعية في نفس الوقت وجمعوا حوالى 75 ألف دولار فيها، وكان فيه حملة تانية اتشهرت جدا للحفاظ على البيئة برضه، الحملة كانت باسم "بورن هاب بيقدم الخشب لأمريكا" هدف الحملة هو زرع الأشجار، وفعلا في نهاية الحملة كانوا زرعوا أكتر من 13 ألف شجرة، لما وعد الموقع إنه يزرع شجرة مقابل كل فيديو بيشوفه أي مستخدم.

لكن مش كل الأماكن بتقبل التبرع من pornhub cares زي مثلا في 2012 فيه مؤسسة علاجية اسمها (سوزان جي كومن) رفضت تاخد أي مساعدة أو تبرع من الموقع ده، وصرح المتحدث الرسمي باسم المؤسسة إن مفيش شراكة بين الموقع والمؤسسة عشان كده هيرفضوا التبرعات ولازم كمان الموقع ماستخدمش اسمنا.

Comments: