إزاي تختار بين اتنين بيحبوك وإنت بتحبهم؟

02/09/2019

نظريًا الواحد أما بيكون محبوب ومرغوب ده معناه إنه محظوظ، لكن عمليًا كونك تتحط في موقف إن في أكتر من شخص في حياتك بيحبك، ومناسب ليك، وإنت كمان بتحبه أو على الأقل معجب بيه، ده مش ألطف في موقف ممكن تحب تعيشه، لأن أي محب بيبقى مستني خطوة من اللي بيحبه، ومش منتظر وجود شريك، ومن ناحية تانية أي حد هتختاره، خسارة التانية هتسببلك ألم.

على الرغم من إن الأسطورة بتقول إن الحب الحقيقي مش بيتواجد إلا مرة واحدة، والقلب يحب مرة ما يحبش مرتين، بس الواقع بيقول غير كده، ووارد إنك تتحط في الموقف ده وتبقى مشاعرك حقيقية وفعلًا في موقف لا تحسد عليه، عشان كده جمعنالك شوية خطوات يمكن تساعدك على الخروج من المأزق ده.

في البداية فيه شوية أسئلة لازم تسألها لنفسك:

1- إيه الجذاب بالنسبة لك في كل حد فيهم؟

2- مين فيهم مستعد أكتر لعلاقة بالمواصفات المناسبة ليك؟ 

يعني مثلًا لو إنت طموحك دلوقتي الجواز، مين فيهم مستعد لده؟ والعكس صحيح.

3- إيه التحفظات اللي عندك على كل واحد؟

 مهما كانت بسيطة لازم تفكر كويس في طباع كل واحد وتفاصيل في الكلام والتعامل والأكل والشرب، وفكر إيه التفصيلة اللي هتقدر تستحملها إيه اللي لا؟

4- أصحابك رأيهم إيه؟

ومش المقصود هنا إنك تمشي ورا رأي حد لأن دي مسألة شخصية تمامًا، لكن اسأل اللي حواليك هما شايفين كل شخص فيهم إزاي، ده ممكن يلفت نظرك لحاجات إنت مش واخد بالك منها، لأن "مراية الحب عامية" زي ما إنت عارف.

5- كل واحد فيه بيخليك تحس بإيه ناحية نفسك؟

مهم جدًا إن شريكك يبقى حبيب وصديق ورفيق كويس، يخليك تحس إنك متميز وجميل ومرغوب، وما تكونش بتعمل مجهود عشان تبان بشكل معين قدامه، حتى لو مجهود بسيط، لأن على المدى الطويل مش هتقدر تعمل ده.

6- إحساسك بيقولك إيه؟

لو حد فاجئك وسألك بتحب مين؟ وطلعت منك إجابة عفوية وبديهية، ممكن تبقى في الغالب عارف من جواك مين الشخص اللي إنت عايزه، مهما فاجئتك الإجابة، فكر كويس ليه قولت الاسم ده؟ وقلبك بيقولك إيه؟

7- مين حياته شبه حياتك في ستايلها؟

8- بتحس بإيه قبل ما تقابل كل واحد فيهم؟

9- بتحس وإنت مع حد فيهم إنك بتخون التاني؟

من ناحية تانية فيه شوية نصايح حاول تعملهم وتفكر فيهم:

1- اعرف كل واحد فيهم أكتر، حتى لو هتضطر تجهز أسئلة وتكتبها عشان تسأله عليها، اعرف أكتر عن الحاجات المهمة والمصيرية، إيه أكتر حاجات بيحبها، أكتر حاجات بيكرهها؟ أكبر صدمة في حياته كانت إيه؟..إلخ.

2- فكر في المستقبل، اعرف عايز تعمل إيه في حياتك، لأنك مش هتقدر تتخيل مستقبل مع حد لو مش عارف تتخيل مستقبلك لوحدك.

3- الانجذاب الجسدي مهم، وما ينفعش تبقى مع شخص مش حابب شكله أو مش منجذب له، لكن لازم تعرف إنه انجذاب فاني، وبينتهي بسرعة بعد التعود، وبتفضل بس الشخصية، ومن ناحية تانية معرفتك بشخصية حد ممكن تعمل العكس وتزود انجذابك ناحية حد شكله ماكانش عجبك في الأول.

4- راقب العلاقة بتمشي إزاي؟ بتحس بإيه مع كل واحد، مين بيخليك حاسس إن عندك طاقة ومبسوط ومين لا؟

5- فكر في أسرتك، لو عيلتك بتاخد جزء كبير من حياتك، فكر فمين هينسجم معاهم أكتر؟ مين هيحبوه؟

6- الاتجاهات الفكرية والثقافية، ومعتقدات شريكك، مهم جدًا إن يبقى فيه بينكوا أرضية مشتركة بينك وبين الشخص اللي هترتبط بيه.

7- ما تتجاهلش فكرة إن ممكن ما يبقاش حد فيهم مناسب.


 

Comments: