١٥ معضلة أبدية بيخلوا أي ست تكره الغسيل بكل مراحله 

02/09/2019

أغلب ستات البيوت أو البنات عموما فيه وقت كبير بيضيع من حياتهم ويومياتهم في الغسيل بس، ومش هما لوحدهم لو تعرف أي حد مغترب هتلاقي إنه بياخد مجهود عشان يفهم عملية الغسيل دي بتمشي إزاي وغالبا بيغلط في الأول، وده عشان الغسيل بيحتاج حد خبرة عشان يتعامل معاه.

عموما الغسيل له أسباب كتير تخليك تكرهه، منها:

1- الغسيل عملية بتعدي بمراحل كتير يمكن لو متعودة على الموضوع مش هتحسي إن دي مراحل كتير بس لأي حد مبتدئ هي مراحل كتير بتخليكي تعملي مجهود 

2- الغسيل لازم يتفرز قبل ما يتحط في الغسالة ولازم تحطي الأبيض أو الفاتح لوحده والأسود أو الغامق لوحده والألوان لوحدهم 

3- فيه أنواع مساحيق كتير للغسيل لازم تبقى عارفة استعمال كل واحد فيهم بمعنى إن فيه مسحوق عادي ومسحوق أوتوماتيك وجيل للأسود ومسحوق للألوان عشان تزهزه 

4- طبعا لو بتستخدمي غسالة أوتوماتيك لازم تعرفي إن فيه فرق بينها وبين الفوق أوتوماتيك في المسحوق، وامتي تستخدمي كل واحدة وإيه نوع الغسيل اللي هتحطيه في كل واحدة 

5- ده غير إن الغسالة الأوتوماتيك مابتشتغلش لوحدها لازم تبقى عارفة كويس البرنامج اللي هتشغلي الغسالة عليه عشان موع الغسيل برضه

6- حتى لو الغسالة الأوتوماتيك بتريحك لازم تبقى مركزة وودنك مع الغسالة عشان كل صوت وله معنى، يعني لو المياه قطعت هتفهمي من صوتها ولازم تقفلي الغسالة إلا لو بتعصر يعني، ولو صفرت معنى كده إنها خلصت وهكذا يعني 

7- الغسيل اللي بيبهت مش هتعرفي إنه بيبهت غير لما يبهت مرة ويبوظ الغسيل والبيت كله هيلوم عليكي عشان إنتي إزاي مابتشميش على ضهر إيدك وتعرفي لوحدة إنه بيبهت!

8- فيه نوع غسيل بيبقى لازم يتغسل على الإيد بدل ما يبوظ وتخسريه للأبد وغالبا الغسيل ده بيبقى هدوم الخروج عشان الخسارة فيها بتبقى متعبة شوية 

9- فقرة نشر الغسيل دي فقرة لوحدها، عشان الغسيل لازم يتنشر بعد ما يطلع من الغسالة لإنه لو اتساب "هيكمكم" وهتضطري تغسليه تاني ولو ربنا بيحبك هيبقى عندك غسالة بمجفف

10- طبعا من ضمن مشاكل نشر الغسيل هو الغسيل اللي بيقع والمشابك برضه، بس الغسيل اللي بيقع عند الجيران وتفضلي تنادي بقى وحوارات كتير لمجرد إن إيدك اتهزت، والهدوم اللي بتقع في الغالب بتكون هدوم ماينفعش حد يشوفها.

11- بعد نشر الغسيل بتيجي مرحلة لم الغسيل واللي بتاخد نفس المجهود وممكن يبقى فيها نفس الغلطات، وبكرر لو ربنا بيحبك هيبقى عندك غسالة بمجفف 

12- العلم اتطور قد ما اتطور بس ماخترعوش لسه جهاز يتحط في البيت بيطبق الغسيل لوحده، فلازم مع كل شوية غسيل هيبقى نهاية رحلتهم إنك بتكومي كوم غسيل على أي كرسي في ويتراكم عليكي تطبقيه 

13- لما المنظر بيبقى غير أدمي بتضطري تطبقي الغسيل وتفرزي الهدوم مع بعض لكل شخص في البيت، وفي الأخر تحطي الهدوم دي في الدولاب 

14- وبعد كل ده بتبقى عارفة إن الهدوم دي هتتلبس تاني وتتوسخ تاني وهتجيلك تغسليها تاني من غير ما حد يحس بالمأساة اللي اتكلمنا على تفاصيلها فوق 

15- وبعد كل ده مش هتستريحي هتعاني من مشاكل "الأوفر ثينكينج" في المعضلة الأبدية هي الشرابات بتروح فين؟!

Comments: