الخطوات الصح اللي هتخليها ترد عليك وتبدأوا من الـ DM 

04/09/2019

الناس من زمان وهما بيتعرفوا على بعض من أماكن مختلفة زي النوادي مثلا أو المواصلات أو الطريق وده اللي خلى مفهوم الحب من أول نظرة يظهر، بس من حاليا ممكن يبقى فيه الحب من أول بصه على البروفايل، عموما السوشيال ميديا سهلت التواصل بين الناس لدرجة كبيرة وده خلى الجملة بتاعة "Started from DM and now we are here" و "Here" دي بتعود على الخطوبة أو الجواز.

لكن للأسف مش أي واحد ممكن يكلم بنت على الـ DM في أي أبلكيشن هترد عليه، لأسباب كتير منهم إنها شافت صوره أو مش عاجبها مثلا أو ممكن تبقى فاكرة الأكونت "فيك" أو ممكن يبقى بدأ الكلام ودخل دخلة غلط، عشان كده خلينا نقولك إزاي تبدأ كلام في الـ DM مع بنت عجباك:

1- اعمل فولو الأول واتأكد إنها عملتلك فولو باك:

لو ماعملتش فولو باك اعرف إن فرصة إنها ترد قليلة، ممكن لسه فيه أمل  وحاول تاني بس الحقيقة إن الفرصة قليلة.

2- خلى أول إنطباع عنك يبقى انطباع كويس:

غالبا أول رسالة دي هي اللي هتخليها يا ترد عليك يا هتتقفل منك، عشان كده ركز كويس هتقول إيه، ماتقولش حاجة عامة ولا حاجة مملة، ماتدخلش تقولها عايز أسألك سؤال، وبلاش إنتي عاملة إيه النهاردة ولا يومك كان عامل إيه عشان إنتوا ماتعرفوش بعض أصلا، خلي الرسالة خفيفة ولطيفة وقصيرة، إلا هتلاقي بلوك في وشك.

3- خلى عندك حاجة تقولها:

لو كنت بتفكر في حاجة من نوعية "إيه يا قمر"، لو كنت فعلا عايز تبدأ الكلام معاها من الدي ام ماينفعش تدخل تقول هاي، ولا إيه الجمال ده وإيه الحلاوة دي، عشان هتعتبرك متحرش في الغالب، فممكن تسألها على حاجة عندها مثلا "متصورة الصورة دي فين؟" أو "المكان اللي متصورة فيه ده أكله حلو" أو قول إفيه مثلا على بوست عندها بس خلي بالك من حته الإيفهات دي ماتهزرش إلا لو واثق في حسك الفكاهي، ممكن ترد على ستوري هي نزلتها مثلا، بس فكر بس في حاجة تديها سبب إنها ترد.

4- يا ريت طبعا لو كنتوا عارفينة بعض في الحقيقة أو فيه أصدقاء مشتركين:

لو شوفتها في حفلة أو في أي مكان على الحقيقة هيبقى أحسن طبعا إنك تبدأ كلام معاها، بس لو هي ماخدتش بالها ممكن تبدأ كلام عن طريق إنك تقولها "الحفلة دي كانت حلوة جدا إنتي كنتي هناك؟ أنا كمان كنت هناك" أو لو كان فيه صحاب مشتركين بينكوا برضه ده بيدي جزء من الأمان وبيزود فرصة إنها ممكن ترد عليك.

5- خليك عارف إنك بتكلمها على الـ Dm مش Tinder:

بلاش تعامل الدي أم زي "الأبلكيشينز" بتاعت الدايت، عشان في أبلكيشن زي Tinder الناس بتدور على إنها تنزل دايت وبيبقى عندهم استعداد لنزول الدايت واستعداد أصلا إنهم يكلموا الناس اللي عملتلهم "ماتش"، لكن في السوشيال ميديا الناس مابتستخدمش "الأبلكيشنز" التانية زي فيسبوك وتويتر وانستجرام عشان ينزلوا دايت، فبلاش تستخدم نفس الطريقة اللي بتستخدمها على Tinder.

6- بلاش تبقى زنان:

لو عايز تجذب إنتباه حد أكيد أول حاجة هتيجي في بالك تعملها إنك تدخل تعمل لايكات كتير وكومينتس على أخر صور له أو "بوستس" عموما، بس الصح بقى إن ده بالظبط اللي المفروض ماتعملهوش عشان هتبان شخص زنان أو Stalker وهتقلق منك وهتعملك بلوك تقريبا.

7- بلاش تبقى مريب ومخيف:

ماتبعتش صور ليك مثلا خصوصا لو صور شايف نفسك فيها حلو وسيكسي، بلاش بجد عشان الحاجات دي مخيفة جدا.

عموما إنت مش داخل إمتحان كيميا يعني مش محتاج تفكر في كل ده، بس خلى المسدج اللي هتبعتها محترمة وبذوق، وخليك ورا قلبك وخمن كده الشخصية اللي قدامك ممكن ترد لو بعتلها إيه، وفي الأخر لو مارديتش مش نهاية العالم يعني المهم إنك حاولت.

Comments: