٩ مميزات هيخلوك تقتنع وتنام عريان: بيمنع زيادة الوزن

05/09/2019

أكيد لما بتفكر تنام أول حاجة بتفكر فيها بعد ما تظبط مروحة عليك أو تشغل تكييف، إنك تتغطى عشان ماتتعبش أو عشان مايجيلكش برد، فالطبيعي جدا إنك لما تفكر تبقى صحتك كويسة أو تحافظ على صحتك عمرك ما هتفكر تنام عريان، لكن الحقيقي إنك لما تنام عريان دي حاجة صحية وليها فوايد ممكن تبقى أول مرة تسمعها بس موقع healthline قالنا على الفوايد الصحية للنوم عريان وهما:

1- هتنام أسرع:

مؤسسة "National Sleep Foundation" قالت إن درجة حرارة الجسم أهم مفتاح عشان جسمك يدخل في النوم، وإنك تبرد جسمك ده بيفهمه إن جيه وقت النوم، فلما بتنام عريان ده بيقلل درجة حرارة جسمك.

2- جودة النوم بتبقى أحسن:

تبريد جسمك مش بس بيساعدك تنام أسرع، تبريد الجسم كمان بيساعد إن جودة النوم تبقى أحسن، العلماء بيقولوا إن درجة حرارة الأوضة المثالية اللي تنام فيها بتبقى من 60 لـ 67 درجة فهرينهايت أو بما يعادل من 15 لـ 19 درجة مئوية، فلو كان الجو حر جدا أو ساقع جدا فكده بيأثر على "حركة النوم السريع" وهي مرحلة النوم اللي بتساعد على تنشيط عقلك وجسمك، والنوم عريان هي الوسيلة الأمثل عشان تفضل بارد تحت الغطا.

3- بيحافظ على صحة الجلد:

فيه دراسات اتعملت عشان تعرف إذا كان النوم القليل هيساعد الجسم على إن الجروح الصغيرة تخف ولا لا، وقسموا المشتركين في الدراسة لـ 3 مجموعات، واحدة نامت نوم كافي، والتانية كانت محرومة من النوم، والتالتة خدت تغذية زيادة، واللي لقوه إن المجموعة اللي نامت كويس هما اللي خفوا أسرع من المجموعتين الباقيين، وده بيثبت إن النوم الكويس بيساعد بشرتك تبقى أحسن وتبقى بصحة كويسة، والنوم عريان ده بيساعد ده يحصل أكتر.

4- بيقلل من التوتر والضغط:

النوم غير الكافي عموما بيزود مستويات التوتر والضغط، وبيساعد الشخص على الاكتئاب وبيزود كمان خطر الانتحار، والعكس طبعا لإن الضغط والتوتر برضه بيزود الأرق، وأكيد لما جودة نومك تبقى أحسن هتنام أحسن.

5- بيمنع زيادة الوزن:

لو كان عندك مشاكل في النوم فأكيد هيبقى عندك مشاكل في حياتك بالتبعية، فيه دراسة اتعملت على 21 ألف شخص لمدة 3 سنين لقيت إن فيه علاقة كبيرة بين عدم كفاية النوم وزيادة وزنهم، الأشخاص اللي كانوا بيناموا أقل من 5 ساعات كانوا معرضين أكتر لزيادة الوزن، ودي فايدة تانية إنك تنام عريان لإن ده هيساعدك جسمك يبقى حلو، لإن الحفاظ على برودة جسمك طول الليل بيساعد الشخص على حرق السعرات الحرارية، فيه دراسة تانية اتعملت على 5 رجالة أثبتت إن التعرض لدرجة حرارة أبرد حوالى 19 درجة مئوية ساعدهم على حرق الدهون.

6- انخفاض خطر الإصابة بأمراض القلب والسكر:

لو إنت مابتنمش كويس فإنت شخص معرض إن يجيلك أمراض قلب وسكر، فيه دراسة اتعملت سنة 2010 كانت عبارة عن إنهم ركزوا في بيانات 1455 شخص خلال 6 سنين لقوا إن قلة النوم بتزود خطر الإصابة بمرض السكر وده بدورة بيزود نسبة الإصابة بأمراض القلب، وعن طريق النوم عريان هيجيلك نوم أسرع وهتروح في النوم وده هيعمل فرق كبير لإن الموضوع متعلق بصحتك.

7- بيحافظ على الصحة المهبلية:

وده لإن الملابس الداخلية بتساعد على خطر الإصابة بأمراض عدوى الخميرة المهبلية، واللي بتنمو في أماكن دافية ورطبة، بغض النظر عن اللي ممكن تلبسه طول اليوم بس النوم هو الوقت المثالي اللي ممكن تنام فيه من غير هدوم أصلا، فممكن تستغل الوقت ده.

8- زيادة الخصوبة عند الرجالة:

مش الستات بس اللي ممكن يستفادوا من النوم من غير هدوم، الرجالة كمان، فيه دراسة اتعملت على 656 راجل عن العلاقة بين لبس ملابس داخلية ضيقة وانخفاض عدد الحيوانات المنوية، فكان الرجالة  اللي قالوا إنهم بيلبسوا "بوكسرات" عدد الحيوانات المنوية عندهم أكتر من اللي قالوا إنهم بيلبسوا ملابس داخليه ضيقة.

9- بتعلي الثقة في النفس:

النوم من غير هدوم هو فرصة كويسة عشان تعرف جسمك وتعزز ثقتك بنفسك ولقيت دراسة إن ده بيساعد الشخص على تقدير الذات واحترامه لشكل جسمه في العموم، وأكيد دي من أهم المكاسب لما الموضوع يبقى له علاقة بحب واحترام النفس.

Comments: