١٧ حاجة ماكنتش تعرف إنهم بيسببوا تقدم في العمر أسرع

06/09/2019

كل ما الشخص بيكبر كل ما بيجيله هوس إنه عايز يخلي شكله أصغر تاني أو عايز يخلي باله من شكله، خصوصا لو ظهرت عليه علامات السن، زي التجاعيد جديدة في وشة أو شعره يبقى رمادي، فيه ناس كتير بتحب تخفي العلامات دي عشان تخفي سنها معاهم، بس من الواضح إن كله حركة وكل فعل بنعمله أثناء يومنا كل يوم بيساعد علامات الكبر إنها تظهر على وشنا زي الكلام والرغي في التليفون وزي النوم على مخدة مش على نفس مستوى رأسك.

عمرك عرفت إيه الأفعال الصغيرة اللي بتزود ظهور علامات الشيخوخة والكبر على وشك؟ موقع best life online قال إيه هي العادات اليومية اللي ممكن نعملها وبتسرع ظهور علامات الكبر زي:

1- إهمال الصداقة:

لو فكرت إيه اللي ممكن ينفعك وينفع جسمك على المدى البعيد في الحياة هيبقى إنك تأكل كويس وتنام كويس وتلعب رياضة، بس اللي ماتعرفهوش كمان إن لازم يبقى فيه صحاب في حياتك.

2- تجربة أنظمة غذائية جديدة:

أكيد كلنا عارفين الشخص بتاع إنت خسيت إزاي؟ وقولي الطريقة، بس الطريقة دي من أخطر العادات اللي ممكن تعملها عشان كل واحد وله النظام المناسب لجسمه، وفيه دراسة اتعملت في 2011 في مجلة أمريكية عن التغذية قالت إن الشخص اللي بيتبع نظام "يويو دايت" ده ممكن يسببله خسارة في الدهون والكتلة العضلية كمان على المدى الطويل، وده له آثار جانبية خطر كتير زي ضعف الحركة مثلا.

3- الشرب من أزايز بلاستيك:

الموضوع مالوش أي علاقة بتسرب الكيماويات من البلاستيك، أنتوني يون مؤلف كتاب MD وهو أخصائي وجراح تجميل شامل كشف إن شرب المياه من الأزايز البلاستيك بيسبب تجاعيد أكتر، وده بسبب إن الشخص بيضم شفايفه وبيشرب من الازازة وبالتالي بيظهر تجاعيد على الشفايف أكتر، وقالوا إن الحل هو شرب المياه من ازايز بقها أوسع.

4- تشيل في نفسك من حد:

الحالة النفسية والعاطفية بتأثر على الحالة البدنية بشكل واضح، عشان كده لو شيلت في نفسك وماخليتش الحاجات تعدي هيكون له تأثير على جسمك وعقلك، وده لإن الشخص بيبقى مكشر أغلب الوقت وحواجبة 111، وده بيسبب تجاعيد.

5- تسيب نفسك للاكتئاب:

الإحساس بالاكتئاب بيأثر بالسلب على الصحة العقلية والنفسية خصوصا لو اتساب من غير علاج بيسرع في ظهور عمليات الشيخوخة.

6- لبس حلقان تقيلة:

ممكن الموضوع يبقى غريب بالنسبالك بس يون بيقول إن كل ما بنكبر في السن كل ما "شحمة" الودن حالها بيتدهور زي تفاصيل كتير في جسمنا، وللستات الموضوع بيبقى أسوأ لإن الحلقان التقيلة بتسبب ترهل في شحمة الودن على مر  السنين.

7- استخدام منتجات العناية بالبشرة اللي فيها كيماويات:

منتجات العناية بالبشرة بتحتوى على مواد كيميائية، وده اللي أكده  لورين ميانو وهو مدرب صحي متكامل ومؤلف كتاب "The Magic of Menopause" وأكد إن منتجات العناية بالبشرة بتحتوى على مواد كميائية بتعطل الهرمونات زي الفثالات والبارابين والمبيدات الحشرية والبلاستيك والحاجات دي بتسبب موت الخلايا قبل ميعادها.

8- عدم الترطيب:

فيه دراسة اتعملت في جامعة كاليفورنيا في سان فرانسيسكو سنة 2019 قالوا فيها إن العناية بالبشرة بيقلل خطر الإصابة بالالتهابات وبالتالي بيقلل من خطر الإصابة بالأمراض المرتبطة بالعمر زي الزهايمر وأمراض القلب والأوعية الدموية والسكر.

9- العرق لما بينشف على وشك:

الأكاديمية الأمريكية للأمراض الجلدية قالت إن العرق بيسبب تهيج في الجلد خصوصا لو اتساب لفترة طويلة، عشان كده اتأكد إنك غسلت وشك قبل النوم وبعد ما تصحى على طول واتأكد إنك طهرتها.

10- إنك تنزل رأسك وتبص في الموبايل:

لما بتنزل رأسك وبتبص في الموبايل في الغالب بيبقي وزن الرأس في الحدود بين  8 و 12 رطل، وإنك تبص لتحت فترة طويلة له تأثير كبير على صحتك، لارفي بيقول إن الكتابة على الموبايل بيسبب ضغط على الرأس والعمود الفقري والرقبة واللي بيسبب للرقبة إجهاد غير مبرر، وده اللي بيخلي العمود الفقري يبقى شكله مش مستقيم.

12- النوم بالمكياج:

المكياج ممكن يخلي شكلك أصغر بالنهار دي حقيقة بس لما تنامي بالمكياج وتنسي تغسلي وشك قبل النوم هيبقى له تأثير بالعكس على بشرتك، خبراء التجميل  للأمراض الجلدية في تكساس جيمي كانتو، لويزيانا قالوا إن المكياج بيسد مسام الوش وبيحطم الكولاجين وبيتسبب في ظهور التجاعيد.

13- استهلاك منتجات ألبان كتير بالليل:

أكيد الكالسيوم مفيد ليك ولجسمك بس كوباية لبن واحدة بس كفاية في اليوم، خصوصا لإن منتجات الألبان بتسبب إلتهاب في المعدة، وعموما المعدة هى الجزء الأساسي اللي بيطهر الجسم من السموم، وصحة الأمعاء هي اللي بتوفر للشخص بشرة نضرة أو لا.

14- شرب الصودا:

الصودا زي ما هي مضرة لجسمك فهي كمان مضرة لعقلك ولأعضاء جسمك كتير، في مجلة "Alzheimer’s & Dementia" اتنشرت فيها دراسة في 2017 لقى الباحثين إن استهلاك الصودا كل يوم بيرتبط بانخفاض حجم المخ وانخفاض وظيفة الذاكرة، والأكتر من كده كمان إنهم لقوا إن الأشخاص اللي بيشربوا صودا كتير معرضين للإصابة بالسكتة الدماغية أو بالأزمة القلبية أكتر 3 مرات من اللي مابيشربوش مشروبات فيها صودا وسكر.

15- شرب الكافيين كتير:

لو كنت عايز تبان إن سنك أكبر مهم جدا إنك تحدد لنفسك عدد كوبيات من الكافيين في اليوم بالكتير كوباية أو 2، لإنه زي مدرات البول،  رانيلا هيرش، الرئيس السابق للجمعية الأمريكية للأمراض الجلدية التجميلية والجراحة التجميلية قالت إن الكافيين والقهوة بيستنزفوا رطوبة الجسم، وأي حاجة بتقلل الرطوبة في جسمك بتخليك تبان أكبر في السن.

16- مابتحطش Sunblock طول السنة:

الشمس عدو شرس جدا للبشرة في الـ 365 يوم في السنة، فلازم تحط Sunblock حتى في الخريف والشتا.

17- الخروج في الشمس من غير نضارة شمس:

زي ما قولنا إن الشمس عدو للبشرة، فأشعة الشمس ممكن تأثر على الجلد اللي حوالين عينك وتسبب في تجاعيد جنب العين.

Comments: