ميرنا الهلباوي: القُراء المتعاليين بيصعبوا عليا وأسلوب كتابتي كان لسه "طري"

08/09/2019

كتبت: نوران عاطف

ناس قالت عليه أدب رحلات، ناس قالت خواطر، ناس قالت رواية خفيفة تخلص في قاعدة، أسلوب عذب، أسلوب مبتدئة..إلخ،  برغم النقد الجيد أو السيء، رواية "مر مثل القهوة حلو مثل الشوكولا" لميرنا الهلباوي، أثبتت نفسها بين قطاع كبير من القراء، والاستمرارية في صدور طبعات لها دليل حي على النجاح، ووجود شيء يستحق مناقشته.

اتكلمنا مع الكاتبة والمدونة ميرنا الهلباوي عن تجربتها ورأيها في النقد البنّاء والهدام.

1- نبدأ من الأول، في حوار سابق قولتي إن علاقتك بالكتب بدأت من طفولتك، إمتى اتحول حب القراية لرغبة في الكتابة؟

اتحول في فبراير ٢٠١١ لما صديق عزيز اقنعني اني اعمل مدونة الكترونية اكتب فيها عشان كان بيشوف تعليقاتي على الأحداث على فيسبوك.. لكن اكتشفت ان موضوع الكتابة بادئ معايا من زمان عشان كنت بكتب دايمًا جوابات لأهلي وصحابي وقرايبي حتى لو مش هديهالهم يقروها.

2- إيه أول نص متكامل كتبتيه؟ مين قراه؟

أول حد قرا نصوصي الأدبية هما صحابي.. ومكنش متكامل أوي، لإني عدلت فيه كتير اللي تحول لكتاب مر مثل القهوة حلو مثل الشوكولا.. قبلها كانت كل كتاباتي في الصحافة (حوارات/مقالات/تقارير).

3- جربتي الصحافة، والكتابة الأدبية، والإذاعة.. إيه أكتر حاجة فيهم لقيتي فيها نفسك؟ وليه؟

الكتابة الأدبية هي اللي أسرت قلبي فعلًا.. هي الحاجة الوحيدة من كل اللي ذكرتيهم بتديني شعور مختلف جدًا من الانبساط والارتياح بعد ما بخلصها و وانا بعملها.

4- اللي يقرا "مر مثل القهوة.. حلو مثل الشوكولا" يبقى عرف قد إيه من شخصية ميرنا؟

شخصيتي مختلفة ومتغيّرة جدًا وانا مبسوطة بده، أنا بمشاعري بأفكاري بأحاسيسي في الكتاب الأول كان أنا فعلًا ولكن في فترة معينة.. لكن شخصيتي ومشاعري وأفكاري دلوقتي اتغيّرت شوية، لكن الصفات الأساسية مبسوطة انها هي هي.. 

5- حياتك اختلفت إزاي بعد صدور روايتك الأولى؟

مفيش اختلاف جذري غير اني بكل ثقة بقيت أقدر أقول إني كاتبة.. يمكن شعور بالامتنان ان فيه ناس بتحب افكاري وكلماتي.. 

6- لو كتبتيها دلوقتي تاني، كل حاجة هتفضل زي ما هي ولا هتغيري فيها حاجة؟

لا هغيّر فيها شوية حاجات.. أسلوب كتابتي كان لسه "طري" زي ما بيقولوا ماستواش.. ولكن ده طبيعي بالنسبة لأول تجربة، في الأحداث نفسها برضه هغيّر شوية حاجات.

7- أكتر رد فعل على الراوية أثر فيكي وما تنسيهوش؟

كان أول حفل توقيع للرواية.. كان في معرض الكتاب.. كنت على وشك الاعتذار.. كنت خايفة جدًا، وعائلتي كانت جاية معايا ف كنت خايفة منظري يبقى وحش قدامهم.. لما رحت لقيت عدد كبير جدًا مستنيني وفضلت ساعة زيادة من كتر الناس اللي بوقعلهم وبيتصوروا معايا.. كان شعور لا يوصف!

8- بتتعاملي إزاي مع النقد سواء كان موضوعي أو هجوم لاذع؟

الأول كنت عبيطة وبتأثر نفسيًا.. دلوقتي بقيت أكثر نضجًا في التعامل مع النقد وتقبله أو تجاهله.

9- بتشوفي إزاي تعالي الناس اللي بتعبر نفسها قراء تقال وقدام  أو التعامل بعجرفة شوية منهم مع تجارب الكتابة الجديدة؟

بيصعبوا عليا عشان محدش بيبدأ حاجة وهو محترف فيها وهيعملها مظبوط من أول مرة.. ف كونه شخص قارئ قديم ومثقف ومش عارف نقطة زي دي أو حتى مخدش باله من تغيّر اسلوب كاتبه المفضل من إصداره الأول لحد إصداره الأخير يبقى فيه حاجة غلط في شكل قراءته وتحليله للأمور.. بس في النهاية دي وجهات نظر.

10- حسيتي إن في طريقك في حاجة كان المفروض توصليلها أو تاخديها وما حصلش بس لأنك بنت؟

اه طبعًا.. على الرغم من اني واخدة حريتي بشكل كبير جدًا جدًا ولكن كان فيه عقبات في طريقي منعتني عن قرارات معينة لإني بنت للأسف. 

11- بتعتبري نفسك فيمنست؟

جدًا. الفيمينزم مش بتعامل مع المرأة كإنها كائن أعلى.. الفيمينزم يعني الست تكون كائن متساوي مع الرجل في الحقوق والواجبات في كافة أمور الحياة.. ف مش عارفة هما ليه مضايقين وخايفين من حاجة زي دي؟ 

12- إيه عاداتك في الكتابة؟

بختار مكان معين بيبقى هو ده المكان اللي مش هغيّره مهما حصل، كل يوم أروحه في نفس الميعاد وأطلب قهوة وبعدين عصير وافضل قاعدة اكتب لحد ما يجيلي صداع وأروّح وهكذا الأيام بتتكرر بنفس الروتين لحد ما أنتهي من الكتابة.

13- بتخلي حد يقرا اللي كتبتيه خطوة بخطوة ولا بعد ما تخلصي خالص؟

بخلي المقربين (٣ أشخاص مثلًا) يقروا كل فصل لما أخلصه ويقولوا لي رأيهم.

15- بتحبي تقري لمين حاليًا؟

حاليًا كنت بقرا كتاب "The monk who sold his ferrari" بس ضاع مني. لسه ما ابتدتش قراءة كتاب جديد عشان كان عندي زحمة شغل الفترة اللي فاتت.

16- إيه الكتاب اللي اتمنيتي تبقي إنتِ اللي كتباه؟

مفيش كتاب معين ولكن فيه كتب أثرت فيا بشكل أعمق من كتب تانية زي رواية "بليغ" لطلال فيصل، "eat pray love" إليزابيث جيلبرت، "أولاد حارتنا" نجيب محفوظ.

17- بتعتبري الكتابة والأدب سوق وفيه منافسة؟

مش مركزة مع حد خالص، مركزة مع منافسة نفسي.. 

18- خطواتك الجاية إيه؟

روايتي الثانية هتكون موجودة في معرض الكتاب في يناير.. متحمسة لها جدًا لأنها أخدت مني مجهود كبير.. نفسي وعقلي..

Comments: