حاجات لازم تمسحها من موبايلك حالا: بتخترق خصوصيتك وبتسرق بياناتك

08/09/2019

مابقاش سر أو حاجة مش معروفة خلاص إن الأبلكيشنز اللي على الموبايل ممكن تتصنت عليك وتعرف عنك معلومات شخصية، خصوصا إن أغلب الأبلكيشنز وإنت بتحملها من على الـ"Google Play" بيبقوا كاتبين ده بس مابنخدش بالنا، أو بناخد بالنا وبنطنش عشان ننزل الأبلكيشن اللي عايزينه.

 بس تطبيقات كتير بتشارك معلوماتك الشخصية وغالبا بتبيعها للمعلنين بفلوس كتير، وأشهر التطبيقات اللي عملت كده الفيسبوك، ويوميا بتظهر تطبيقات مخيفة جدا وخطر علينا زي ما ظهر كده التطبيق بيتاع "Face app" لمدة قليلة جدا، تقريبا أسبوع ،وكانت الميزة اللي حاطتها هي إن الناس تشوف صورتها ووشها لما يكبروا في السن، وانتشر كلام كتير إن التطبيق بياخد بياناتك الشخصية اللي على موبايلك.

بس اللي لازم تعرفه إن سلامتك وسلامة موبايلك في إيدك، عشان كده هنقولك على شوية نصايح تعملها عشان تأمن موبايلك:

1- الألعاب المجانية:

تطوير اللعبة بيكلف المطورين مجهود وفلوس كتير أوي فخليك عارف إنك لما تنزل اللعبة ببلاش هتلاقي مشكلة زي الإعلانات الكتير اللي كل شوية تطلعلك واللي بتاخد مساحة كبيرة من مساحة التخزين في موبايلك، ده غير إن بيبقى في فرصة إنه يسرق معلومات شخصية عنك وبعد كده يبيعها، عشان كده لو عايز تنزل لعبة اتأكد كويس من شروط الاستخدام.

2- تطبيقات الشحن السريع:

فيه تطبيقات كتير أوي بتقنعك إنها هتخلي موبايلك يشحن أسرع، والحقيقة إن مافيش أي تطبيق ولا أي حاجة ممكن تخلي موبايلك يشحن أسرع وإن التطبيقات دي خدعة كبيرة وبتخلى الإعلانات تظهرلك بشكل مبالغ فيه حتى وإنت قافل شاشة الموبايل.

3- تطبيقات الـ Wi-Fi:

فيه تطبيقات بتوهم الناس برضه إنها هتوفرلهم واي فاي مجاني وبتحمي شبكة الواي فاي بتاعتك، واكتشفوا برضه إن معظمها ممكن يسرق بياناتك الشخصية برضه وممكن يسرق معلومات عن "الكريديت كارد" بتاعتك.

4- مشغلات الموسيقى مجهولة المصدر:

بغض النظر إن التطبيقات دي بتتسبب في استنزاف كبير في بطارية الموبايل، وهتاخد جزء كبير من مساحة التخزين في الموبايل عندك بسبب الإعلانات، وغالبا هي تطبيقات مضرة لموبايلك، لإنها غالبا بتحتوي على فيروسات، وأكواد للقرصنة وبتاخد معلوماتك الشخصية برضه.

5- تطبيقات تتبع الموقع:

زيها زي كل التطبيقات اللي فوق برضه، بتاخد معلومات شخصية ومشكلة الإعلانات، وأغلب التطبيقات اللي بتأكد عليك إنك لازم تفتح "اللوكيشن"، فممكن تتأكد من شروط الاستخدام في "إعداد التطبيق".

6- التطبيقات اللي بتطلب معلومات شخصية:

فيه تطبيقات كتير بتطلب منك رقم التليفون، وإنها تدخل على جهات الاتصال والرسايل والصور والموقع، وأغلب التطبيقات اللي بتنزلها بتعرف عنك المعلومات دي، عشان كده خلى بالك وانت بتعمل "تثبيت" لتطبيق على الموبايل.

7- المتصفح اللي جاي مع الموبايل:

المتصفح اللي بيبقى جاي مع الموبايل من قبل كده غالبا أول ما بتدوس على أي لينك بيفتح لوحده، أغلب الوقت المتصفح ده مابيحميش بياناتك الشخصية ومابتحميش الموبايل ضد الفيروسات، وبتخلي الموبايل يبقى أبطء بشكل كبير.

8- تطبيقات من غير أسباب:

أكيد كل واحد مننا عنده تطبيق على موبايله بيقعد بالأسابيع والشهور مابيجيش جنبه، والحقيقة إن كل ما عدد التطبيقات بيزيد على الموبايل كل ما عمر البطارية بيبقى أقصر، عشان كده خد دقيقة كل فترة وفلتر اللي إنت عايزة من اللي مش عايزة.

Comments: