٣ حاجات ما تقولهمش أبدًا في خناقة

09/09/2019

الخناقات فخ كبير ممكن أي حد يقع فيه وقت غضبه، على الرغم من إن التعبير عن الزعل أو اللوم صحي ومش عيب، لكن الفخ هو إنك تقول حاجات وليدة لحظات الغضب، مش بتعبر عن أفكارك أو حالتك طول الوقت، لكن اللي هيحصل إنها هتسيب شرخ، أو هتحطك في موقف ممكن ما تعرفش تحله أو توضحه بعد كده بأي شكل، جمعنالك أهم الحاجات الشائعة اللي بنقولها وقت الخلافات ما تحتد، واللي بتغير مسار الحوار والمشاعر وإنت مش قاصد ده!

1- المشكلة إنك… (أناني، مغرور، غبي...إلخ)

إصدار الأحكام مفيش أسهل منه، لكن لازم تعرف إن مثلًا مديرك أما يديك شغل مش بتحبه هو في اللحظة دي بالنسبة لك سخيف وشرير، وأما حد بيعطل المرور بيبقى بالنسبة لك بارد، وأما شريكك بيعوز منك مشاعر أو اهتمام أكتر بتقول عليه متطلب، كلها حاجات لحظية وبتوصف موقف الشخص ده بالنسبة لك في اللحظة دي، ما ينفعش تقول أحكام مطلقة إن دي شخصيته بشكل عام مهما كنت مقتنع بده في اللحظة دي، ده هيخليك تخسر المناقشة، وتخسر اهتمامه برأيك لأنه هيتأكد إنك شايفه غلط.

2-إنت بتخليني أحس ……….. (بزعل، بحسرة، بغضب، بإحراج...إلخ)

مفيش حد بيخليك تحس بحاجة، مشاعرنا مسؤوليتنا، مهما كان اللي قدامك عمله، ما ينفعش تحمل حد مسؤولية اللي إنت حسيته من التصرف ده، وفي الغالب مشاعرك بيتحكم فيها أفكارك وإدراكك وحكمك الشخصي على الأمور واللي مش شرط يكون الطرف تاني يقصده أو فاهمه.

3- إنت لازم تعمل….(تساعد، تهتم، تغسل، تطبخ..إلخ)

تخيل لو حد إداك أمر إنت تعمل أي حاجة، موقفك هيكون إيه؟ أكيد مش هتحب ده، ومهما كنت مقتنع مش هتشوف إن فيه حد من حقه يديك أمر وكمان في خناقة وبغضب والمفروض إنك تنفذه!

Comments: