٩ نصايح عشان تختار مكان مناسب للتاتو

09/09/2019

التاتو من الأفكار اللي بتداعب ناس كتير، سواء للزينة أو للتعبير عن حاجة في شخصيتهم، أو لشجاعة خوض تجربة إنك تحط حاجة يفترض إنها هتفضل معاك طول عمرك، أو على الاقل فترة طويلة توصل شهور أو سنين، بس عشان تاخد الخطوة دي لازم في البداية تعرف تختار مكانه المناسب وكل مكان مشاكله إيه، عشان كده جمعنالك هنا شوية نصايح زي ما ذكرهم موقع "Buzz feed".

1- خلي بالك لو التوازن بيفرق معاك

لو حطيت تاتو في جزء واخد نص من جسمك، ممكن بعد شوية تحس إنك عايز الجنب التاني يبقى زيه عشان تحس إنك متوازن.

2- لو تاتو ملون، ابعد عن الشمس

لو بتفكر في تاتو ملون لازم تعرف إن الشمس بتأثر عليه وعلى شكله، لو عايز تخليه في مكان مكشوف من جسمك يبقى الأفضل تخليك في الأسود، لكن لو حابب الملون يبقى خليه في مكان ما بيتعرض كتير للشمس.

3- لو ما تقدرش تستحمل الألم ابعد عن الأماكن الحساسة

أماكن زي الرقبة أو البطن، بيكون جلدهم حساس أكتر، لو مش هتقدر تستحمل الألم فيهم ابعد عنهم.

4- تجنب المفاصل

الكوع والركبة والأماكن اللي ممكن تبقى ناشفة.

5- لو عايز تاتو ما يحتاجش تجديد كتير تجنب القدم والكف

تجنب الأماكن اللي بيتجدد فيها الجلد بسرعة وباستمرار زي القدم والكف، لأن ده هيسبب تشوهات في التاتو وهتحتاج تصليح له كل شوية.

6- الدراع مناسب لو عايز تاتو سهل

دراعك سهل الوصول له عشان تحط التاتو، وعشان تحط مرطبات في الفترة اللي بعد عمله، كمان سهل كشفه أو تغطيته من الشمس والعوامل الجوية بشكل عام.

7- خلي شكل التاتو يحدد مكانه

لو بتفكر في رسمة رأسية يبقى شوف الأماكن اللي فيها مساحة طول زي الدراع أو الساق، ولو رسمة أفقية يبقى أماكن فيها مساحة عرض زي الضهر، والكتف.

8- لو عندك نمش خلي بالك إنه هيبان

لو فيه نمش في أي مكان في جسمك ناوي تختاره للتاتو، خلي بالك إنه هيبان منه خصوصًا لو ملون بألوان فاتحة.

9- خلي بالك من المكان اللي هيأثر على شغلك

لو وجود التاتو في مكان واضح هيأثر على وضعك الوظيفي، ومكانتك في شغلك، لازم تفكر في ده.


 

Comments: