بنفكرك بيه: مسلسلات عربي تشغلها في خلفية يومك

09/09/2019

أي مسلسل جديد محتاج تركيزك، ولو مش عربي هيحتاج عينيك حتى لو شوفته قبل كده، وفيه أوقات بتبقى محتاج بس صوت جنبك، وإنت بتاكل أو تشتغل أو تلعب في الموبايل، عشان كده هنفكرك هنا في شوية مسلسلات، تونسك وتسلي وقتك، من غير ما تضايقك بأفورة أو مستوى مش مقبول.

1- عفاريت السيالة

من ألطف أدوار أحمد الفيشاوي وعبلة كامل، بيقدم قصة "مغاوري" اللي عايش في السيالة في إسكندرية وبتربيه خالته، وبيظهر أبوه فجأة عشان يديله ثروة كبيرة تغير حياته، المسلسل فيه دراما قوية وبتتقدم في قالب كوميدي بيقدم باقتدار كل أبطال المسلسل وحتى أصحاب الأدوار الصغيرة.

2- لن أعيش في جلباب أبي

أسطورة "عبد الغفور البرعي" عايشة وبتتألق مع كل جيل جديد، والاستمرارية دايمًا دليل النجاح، لو شوفته هتشوف مسلسل بيقدم قصة معمولة بشكل كويس، وهتكون في الغالب حافظه عن ظهر قلب لأن مفيش حد ما شافهوش على الأقل مرة في عمره، فمش محتاج تركيز كبير منك.

3- زيزينيا

في خانة المسلسلات ممكن تحط مسلسلات كتير ليحيى الفخراني لأنه من أقوى اللي قدموا أعمال درامية مصرية، وزيزينيا بالجزئين بتوعها تعتبر من أكتر المسلسلات تميز اللي قدمت إسكندرية وشخصياتها بشكل هادي ورقيق وإطار درامي محكم.

4- أوبرا عايدة

من المسلسلات القابلة إنك تشوفها مرات كتير وما تزهقش منها، ويعتبر أول عمل مصري يناقش فكرة القتل الرحيم، وهي إنهاء حياة شخص بيعاني من مرض مالوش علاج وبيتعذب بوجوده على قيد الحياة، وبيناقشها عن طريق قصة الدكتورة عايدة اللي قتلت مريض عندها بالسرطان، وبيدافع عنها سيد عبد الحفيظ المحامي الشهير بأوبرا وبيحاول يثبت حسن نيتها.

5- الرقص على السلالم المتحركة

ما يعتبرش من أقوى مسلسلات مرحلته، لكن هو نجح بشكل كبير وقتها، لأنه قدر يركز على مشاكل المراهقين وطلبة الثانوية في بداية الألفينات واللي كانت بدأت تاخد شكل مختلف عن قبلها بسبب بداية ظهور التكنولوجيا والإنترنت والفضائيات، وتفشي ظاهرة الدروس الخصوصية بشكل أكبر من الأول، من ناحية تانية اللي قام بدور الشباب كلهم كانوا واعدين وقتها واًصبحوا نجوم صف أول بعدها زي ياسمين عبد العزيز، ومحمود عبد المغني.

6- عيون

فترة زمنية مختلفة، لكنه فيه قطبين كبار من أقطاب الكوميديا، وهما فؤاد المهندس ويونس شلبي، في مسلسل بيجمع بين الغموض والدراما والكوميديا، عن محامي شهير، بيكتشف إنه بيمشي وهو نايم، وبيشك إنه عمل جريمة قتل خلال نومه، وبتدور الحلقات حوالين محاولاته للوصول للحقيقة.

7- امرأة من زمن الحب

حالة قريبة من "الرقص على سلالم متحركة"، في فكرة مناقشة القضايا والشباب الواعد، والنافذة اللي على عالم شباب الألفية الجديدة.

8- أميرة في عابدين

من تأليف أسامة أنور عكاشة، وبطولة سميرة أحمد، حنان ترك، سميحة أيوب، ومحمد رياض، وبيقدم قصة مصرية خالصة لأسرة بتخسر أملاكها وبيرجعوا بيتهم القديم في عابدين، وبيحاولوا يتصالحوا مع ظروفهم وحياتهم الجديدة.

9- بكيزة وزغلول

مفيش ألطف من 14 حلقة بتشوف فيهم شخصيتين مختلفتين عن بعض تمامًا زي بكيزة الأرستقراطية، وزغلول القروية الفقيرة، واللي بتجمعهم الظروف وبتربط مصيرهم ببعض، عشان يعيشوا ويبدأو حياتهم من جديد.

Comments: