مطربة "الفيل الأزرق 2": توقعت المقارنة مع "منير" وما اتضايقتش من اللي قالوا "وحشة جدًا"

10/09/2019

كتبت: نوران عاطف

الفن الحقيقي هو اللي يقدم قطعة تقدر تعبر الزمان والمكان، لأنها ما بتخاطبش جنسية أو دين أو ثقافة معينة لكن بتخاطب مشاعر وإدراك إنساني موجود في كل وقت، عشان كده أغنية "الدنيا ريشة في هوا" اللي غناها الفنان سعد عبدالوهاب سنة 1956 في فيلم "علموني الحب"، واللي كانت من تأليف مأمون الشناوي وتلحين محمد عبد الوهاب، قدرت تحافظ على تأثيرها وقيمتها بعد تقديمها بشكل جديد للمرة التانية في تاريخ السينما.

إعادة تقديم الأغنية للمرة الأولى كانت في 2004 للفنان محمد منير في فيلم "أحلى الأوقات"، والتانية كانت في 2019 خلال فيلم "الفيل الأزرق 2" وقدمتها المغنية شيرين عبده مع فريق "ديسكو مصر".

“الفيل الأزرق 2" قدر يوصل بإيراداته لصدارة قايمة الأفلام الناجحة في تاريخ السينما المصرية، عشان كده بتحكي "شيرين" إن تقديم الأغنية كان نقلة وانتشار مهم لها، لأنها كفنانة مستقلة ما عندهاش وسايل تسويق كتير عشان تقدم نفسها للجمهور باستمرار، فنجاح الفيلم الكبير ساعدها في إن يكون لها شباك على عالم جديد.

الأغنية تم اختيارها من صناع الفيلم من الأول، وتم الاتفاق مع فريق "ديسكو مصر" وبعدها اتصلوا بيها "أعتقد الأستاذ هشام نزيه كان له يد في الاختيار ده، لأني اشتغلت معاه في حاجات قبل كده زي "السبع وصايا" و"العهد" و"الفيل الأزرق" الجزء الأول، لكن كنت في الكورال مش غنا منفرد، فأعتقد إنه رشحني وكلموني، وكانت أول مرة ليا مع" ديسكو مصر" كمان" بتحكي "عبده".

تقديم الأغنية من فنان كبير زي محمد منير قبل كده صنعت مقارنة إجبارية لكل اللي سمعوها ودي حاجة بتقول "شيرين" إنها كانت عاملة حسابها من أول لحظة "كنت عارفة تمامًا إن الناس أول ما تسمع هتحطني في مقارنة مع "منير" وبالفعل ناس قالت إن أغانيه ماحدش ينفع يغنيها مكانه، بس أنا كنت شايفة إن لو الواحد عنده طريقة خاصة بيه يقدر يطلع من نفس الأغنية حاجة جديدة ومختلفة خالص ومش هيبقى فيه الصراع ده".

في نفس السياق اختلفت ردود الأفعال بين ناس شافت إن مطربة الأغنية كانت "أجمل حاجة في الفيلم" رغم إن كتير منهم كانوا أول مرة يشوفوها، وناس شافوها "وحشة جدًا" على حد تعبير "شيرين" اللي بتكمل "ما اتضايقتش عشان دي أذواق يعني مش هقول للناس يشوفوها حلوة بالعافية أو أنا شايفاها حلوة فشوفوها كده!

عن التصوير بتحكي شيرين عبده إن الموضوع أخد يوم كامل تقريبًا "ألطف حاجة كانت إني قابلت ناس لذيذة جدًا زي كريم عبد العزيز، ومروان حامد وتارا عماد، وأصعب حاجة الوقت الطويل والاستراحات الكتير وإنك تعيد نفس الحاجة مرات كتيرة.. الموضوع مختلف أوي عن الغنا".


 

Comments: