٧ نصايح لمقاومة اكتئاب تغيير الفصول

10/09/2019

على الرغم من إن تغيير الفصول عملية طبيعية موسمية متكررة، إلا إن تأثير التغير ده بيكون سيء على بعض الناس، وبيسبب لهم أعراض اكتئاب، وتغيير مستمر في المزاج خارج عن إرادتهم، عشان كده ولو إنت من الناس دي جمعنالك شوية نصايح، ممكن تساعد في الأيام دي، زي ما ذكرهم موقع "Everyday health".

1- الحركة

حاول تلعب رياضة في الهواء الطلق، زي المشي أو الجري، ده بيتوصف حتى لحالات الاكتئاب التقليدية، ولو فيه أي عوائق بسبب تغيير الجو أو المساحة المتاحة للجري ممكن تستبدله بالمشاية أو العجلة في الجيم، الحركة هتفرق في حالتك النفسية وهتمنع زيادة الوزن اللي بتعتبر من أعراض اكتئاب تغيير المواسم.

2- استفيد بضوء الشمس

لو في بيتك أو مكتبك خلي دايمًا ضوء الشمس يدخل، وانزل اتمشى في وقت الضهر والعصر اللي بيكون فيهم شمس قوية، ده هيفيدك ويقلل من اكتئابك خصوصًا لو مرتبط بدخول الشتا.

3- التزم بجدول

اللي بيعانوا من اكتئاب المواسم دايمًا عندهم مشكلة في تنظيم مواعيد النوم، ما بيقدروش يناموا بالليل ويصحوا في معاد مناسب بالنهار، حاول تعمل جدول لمواعيد نومك وصحيانك عشان تلحق ضوء النهار وتنظم أكلك ومواعيده، لأن ده كمان هيمنع زيادة الوزن المرتبطة بالفترة دي.

4- خد أجازة

الأجازات مش للصيف بس، لو عندك مشكلة مع دخول الشتا، خد أجازة ورح لمكان مشمس ودافي، ده هيفرق معاك وهيديك طاقة لوقت طويل بعدها، من ناحية تانية هتاخد استراحة من روتين يومك العادي وضغطه اللي بيزود أعراض الاكتئاب أو بيصعب التعامل معاها.

5-اكتب يومياتك

الكتابة في الفترة دي هتفرق معاك كتير لأنها بتطلع جزء كبير من الطاقة السلبية اللي جواك، وبتخليك تفهم مشاعرك وتفاصيلها أكتر، حاول تكتب كل يوم لمدة ربع ساعة أو 20 دقيقة بالليل، تطلع فيهم كل أفكارك عن اليوم واللي حصل فيه.

6- زود من فيتامين D

اثبتت الدراسات إن اكتئاب دخول الشتا، مرتبط بانخفاض نسبة فيتامين D في الدم، واللي ممكن تستشير دكتورك في الجزء ده وتختبر جسمك.

7- خليك مبادر

ما تستسلمش للبيات الشتوي، خلي دايمًا جدول مواعيدك مليان بمبادرات منك للخروج، التمشية، السينما، المسرح، أو مقابلات أصحابك.

Comments: