٧ حاجات عشان ما تبقيش سخيفة وإنتِ بتكلمي صحباتك السينجل

10/09/2019

من الحاجات الشائعة واللي مش لطيفة، هي تغيير طريقة البنات بعد ما يتخطبوا أو يتجوزوا وتحولها لصيغة الشخص الأكثر خبرة والعالم ببواطن أمور كتير صحباتها ما يعرفوش عنها حاجة!

الطريقة دي بتبقى محل سخرية، وممكن تبقى سبب خلاف أو فجوة بين أي واحد وصديقاتها، فالموضوع ده بيقدم النصايح الموجوده في موقع "Bustle" عشان تخلي بالك وما تبقيش الشخص المزعج ده من غير ما تقصدي، أو عشان تنصحي بيه شخص شايفة إنه بيعمل كده.

1- خلي خبرتك الشخصية بره الموضوع

رغم إنه طبيعي إننا نستخدم تجاربنا الشخصية للحكم على الأمور، لكن لما حد يحكيلك إنه بيمر بحالة معنية، فتبدأ بالكلام إنك كنت كده لحد ما قابلت شريك حياتك، ده بياخد التركيز عن قصة صديقتك وتفاصيلها، بجانب إنه بيدي اللي قدامك أمل ممكن ما يكونش حقيقي لأن كل قصة لها تفاصيلها وظروفها، الأفضل إنك تسمعي صحبتك كويس ولو عايزة تقدمي تعليق أو نصيحة يكون بناء على شخصيتها واحتياجاتها وأفكارها، لو سمعتيها كويس أكيد هتلاقي رد مناسب بناء على الحاجات دي.

2- اسمعي من غير أحكام أو افتراضات

صديقتك دايمًا هتيجي تحكيلك عن تفاصيل حياتها العاطفية وارتباطاتها أو مشاكلها، من غير ما تكون عايزة منك نصيحة، أفضل حاجة ممكن تقدميها هي إنك تسمعيها كويس حتى لو مش هتعلقي، مفيش لزوم لكلام من نوعية "مشكلتك إنك صعبة الإرضاء" مثلًا أو أي كلام شبهه فيه أحكام مطلقة أو استنتاجات ممكن ما تبقاش حقيقية.

3- ساعدي صديقتك تعرف هي بتدور على إيه

أكيد إنتِ مش عايزة تحسسي صاحبتك إن كونها مش مرتبطة لحد دلوقتي ده غلطتها! لو عندك صديقة شايفة إنها بتكرر نفس الأخطاء كل مرة وبتربط نفسها من أشخاص مش مناسبين أو مش مستعدين لعلاقات جاده، حاولي تكوني مباشرة في أسئلتك لها اللي تخليها هي تعرف المشكلة فين وتحس إنها ممكن تحلها.

4- خليكي داعمة ومشجعة

صيغة النصيحة في أحيان كتير ممكن تحسس اللي قدامك إن اللي بيحصل مشكلته هو، وفي أوقات كل اللي صاحبتك ممكن تبقى محتاجاه إنك تقول كلمة مشجعة تزود ثقتها في نفسها، يعني بدل ما تستخدمي كلام عن مشاكلها ممكن تقول كلام من نوعية إن فعلًا إيجاد شريك حياة حاجة صعبة، أو إنك بتعملي اللي تقدري عليه عشان تتفاهمي مع شريكك.

5- بلاش كليشيهات

آخر حاجة أي حد في الحياة عايز يسمعها، هي نصيحة عامة كليشيه بيتقال لكل الناس، حتى لو كان صح ومناسب للموقف، لكن مش ده اللي حد بيعاني في حياته عايز يسمعه، لو ما عندكيش حاجة محددة وفيها نصيحة، اسكتي واسمعي بس.

6- اعملي حدود 

مش معنى اهتمامك الشديد بحياة صديقاتك أو مشاكلهم إنك تهددي استقرارك وسعادتك، لو الدنيا ماشية معاكي هادية ولطيفة حاولي تتجنبي إنك تندمجي جدًا في مشاكلهم لدرجة تفسد حياتهم الشخصية وطريقة تعاملك معاها، ساعتها مش هتقدري حتى تساعديهم، لأن الشخص المُستنزف صعب يقدر يقدم حاجة لحد.

7- ما تزعليش لو ما اخدتش بنصيحتك

معروف إن سماع شخص والتفكير معاه بيتطلب منك تركيز كبير وبياخد طاقة عشان تطلع نصيحة مدروسة ومتكاملة، لكن لو صاحبتك ما اخدتش بيها مش لازم تضايقي، ممكن تبقى المشكلة مش في النصيحة لكن كل واحد بيحب يتعامل مع مشاكله بطريقته الخاصة.



 

Comments: