٨ اختلافات بين مدارس زمان ومدارس دلوقتي: هل جلست على الـ Naughty Chair ؟

10/09/2019

كلها أيام والدراسة تبدأ، وتبدأ معاها نفس المعانة اللي بيعانيها الشخص كل سنة لمدة 16 سنة، مدرسة أو جامعة الصبح ودي غالبا مافيهاش مشكلة غير الصحيان بدري والحضور، بس معاناة بعد الضهر أو بالليل هي المذاكرة، المشكلة دي محدش بيقدر يحلها على مدار الـ 16 سنة تعليم.

بس الحياة دلوقتي اختلفت عن زمان (اللي هو من 10 سنين) كتير حتى في التعليم والتحضير للمدارس خلينا نقولك شوية اختلافات بين التعليم زمان والتعليم دلوقتي:

1- مبدئيا لبس المدرسة زمان كان عبارة عن قميص أبيض أو كحلي وساعات بيبقى فيه قمصان كاروهات، وطبعا الولاد بنطلونات والبنات جيب أو "درسيس"، بس الموضوع دلوقتي اختلف وبقي لبس المدارس عبارة عن تي شيرت بلون روش، مع بنطلون كاروهات.

2- زمان الأكل كان عبارة عن سندوتشات جبنة ومربة ويوم ما ربنا بيفتح عليك بيبقى سندوتشات لانشون وسوسيس، بس حاليا الموضوع اتطور السندوتشات بقيت توست وبقى فيه سناكس فاكهة وخضار وحاجات كده غريبة

3- الأكل ده كله كان بيتحط في كيس بلاستيك حاليا بقى يتحط في لانش بوكس بالشيء الفلاني.

4- الحاجة اللي كنت بتاخد فيها مياه من البيت كانت يا إزازة بلاستيك أو زمزمية، دلوقتي بقى اسمها water flask .

5- طلبات المدرسة كانت معروفة وأي حد بينزل يجيب الطلبات من الفجالة قبل الدراسة اللي هي كراسات وكشاكيل 80 ورقة و100 ورقة وجلاد أصفر وأحمر وأخضر وألوان كتير، الموضوع دلوقتي اتطور وبقى فيه ورقة Supplies من مكتبات معينة بتدفع فيها اللي وراك واللي قدامك.

6- زمان كان كتاب الوزارة وكتب المدرسة هي الأساس، بس حاليا فيه "شيت".

7- تبعا لتطور الحياة بقى اسمه جروب الماميز بتاع الكيلاس، بس زمان كان اجتماع أولياء أمور 

8- اللي كان بيتكلم أو يعمل حاجة غلط زمان كان بيطلع برا الفصل، أو يقف شوية، أو يتعمله استدعاء ولى أمر أو أي عقاب من الحاجات دي، بس حاليا الموضوع بقى سيكي ميكي لدرجة إنهم بيقعدوا في "النوتي كورنر" أو على "النوتي تشير".

Comments: