١٠ حاجات تقولك إن الخريف فصل مناسب لدخول علاقة جديدة

10/09/2019

بعد طول انتظار إن الصيف يخلص ونتخطى العرق والتلزيق والحر والشمس الحارقة، بدأ الجو بتاع شهر 9 ده أخيرا اللي هو حر الصبح شوية ومن المغرب كده شوية هوا وبليل لسعة ساقعة، الجو ده مابيزعلش حد اللي عايز يصيف لسه بيصيف فيه واللي عايز هوا وساقعة بينزل بليل عشان دي بقي حلاوة جو الخريف.

وبالرغم إن الخريف ممكن يبقى أحلى الفصول في الجو بس مابيبقاش مريح برضه بالنسبة لكل الناس، لإن الجو المايع بتاعه ده بيخليك تحس إنك عايز تصاحب وبتبدأ تقفش نفسك بتحس مشاعر غريبة ناحية ناس قريبين منك، وفي الغالب -عن تجربة شخصية- الخريف هو أكتر وقت هتبدأ فيه علاقات وهتحب فيه، وفعلا الخريف أكتر جو مناسب للدخول في علاقات للأسباب دي:

1- الجو بيبقى أبرد من الصيف اه مش زي الشتا بس أبرد، بيسمحلك إنك تحضن الشخص اللي قدامك من غير تلزيق بما إن أصلا في الصيف صعب تقرب لحد 

2- ولإن الجو برضه بيبقى أبرد فممكن تمسك إيد الشخص اللي معجب بيه أو شريكك من غير ما إيدكوا تعرق وتقرفوا من بعض.

3- مع بداية شهر 10 كده هتلاقي إن الجو بقى أحلى شوية فممكن تعرفوا تخرجوا سوا في أماكن مختلفة وتعملوا نشاطات مختلفة، ويبقى فيه "ديتس" في أماكن مفتوحة أو ممكن أصلا تسافرو سوا.

4- هتلاقي صحابك كمان بيخرجوا كتير في الوقت ده، وبكده هتعرف تعرفه على صحابك، وفي نفس الوقت هتعرف صحاب الطرف التاني إنت كمان وهتبقوا دخلتوا في حياة بعض بكل سهولة.

5- الوقت ده من السنة من شهر سبتمبر لشهر ديسمبر فيه أفلام كتير هتنزل في الوقت ده، وهيبقى فيه فرصة تفرجوا مع بعض على أفلام كتير وتدخلوا سينما كتير.

6- الجو ده بيشجع الناس على المشي جدا والمشي مفيد جدا لو بتتعرف على حد، هيخليكوا تتكلموا مع بعض وتتعرفوا على بعض أكبر.

7- وأكيد طبعا الحاجة "الكليشيه" إن ورق الشجر بيقع في الخريف وده هيبقى حلو جدا في لحظات الرومانسية والتسبيل.

8- هيبقى عندك شخص في الشتا يفكر تاخد شمسية وإنت نازل وتلبس تقيل وتشرب معاه هوت تشوكليت أو سحلب أو حمص الشام على حسب تفضيلاتك في الشتا

9- هيبقى فيه نفس الشخص اللي هيبقى "بارتنار" ليك في احتفالات "الكريسماس" وخروجات المطرة والنزولات الصباحية في الشتا.

10- هتدخل العلاقة بقلب جامد لإن في الوقت ده مش هتبقى مهتم إنت لازم تاكل إيه عشان جسمك يبقى مظبوط وتعجب الطرف التاني، ومش لازم تعمل فورمة الساحل عشان تبهره، كده كده اللبس كل شوية في اليومين دول بيسقع واللبس بيداري

Comments: