ملخص مؤتمر "أبل" ٢٠١٩: "آيفون ١١" وصل وخدمة بث رقمي تنافس نتفليكس!

10/09/2019

النهاردة 10 سبتمبر شركة "أبل" عملت المؤتمر اللي أغلب مستخدمين أبل مستنينه بقالهم فترة، وأعلنوا عن أعمالهم اللي هيتم إصدارها السنة دي وهي:

1- آي فون 11 

نزل منه ٣ فئات الآيفون 11 والآيفون 11 برو والآيفون 11 برو ماكس!  

وقالوا إنه هيكون بـ 3 كاميرات لفئة البرو والبرو ماكس، وهيبقى فيه منه 7 ألوان مميزة وهما البنفسجى والأصفر والأبيض والأسود والأحمر والأخضر، والشاشة هيبقى حجمها حوالى 6.5 بوصة لفئة البرو ماكس و5.8 بوصة لفئة البرو، والكاميرا الرئيسية في البرو هتبقى ثلاثية (تيليفوتو- وايد- الترا وايد) بدقة "12 ميجابكسل"، والكاميرا الأمامية هتبقى بدقة "12 ميجابكسل"، وهما الاتنين هيبقى ليهم القدرة على تصوير الفيديو بجودة "4k"، وبسرعة 60 إطار في الثانية، مع تقنية التصوير البطيء.

أما الأسعار فهتبدأ بـ 699$ للآيفون 11، وهتبدأ من 999$ للآيفون 11 برو، وهتبدأ من 1099$ للآيفون برو ماكس، وده على حسب اختيارك لسعة تخزين الموبايل، الموبايل هيتم بيعه في السوق الأمريكي من يوم 20 سبتمبر 2019.

2- أبل ووتش

هيتم إصدار الجيل الخامس من ساعة "أبل"، سعرها هيبدأ من 399 لـ 499 دولار، وهتكون متوفرة في السوق من 20 سبتمبر، والساعات الجديدة هيبقى فيها ميزة إن المستخدم يقدر يشوف منها الوقت والإشعارات من غير ما يرفع إيده، وعمر بطاريتها هيوصل لـ 18 ساعة، بالإضافة لتحديثات طبية قوية أبل بتراهن بيها.

3- أبل تي في +

جه الوقت اللي "أبل" قررت تنافس فيه العملاق "نتفليكس"!

"أبل" أعلنت عن إطلاق خدمة بث عبر الإنترنت جديدة عائلية هتبدأ من 1 نوفمبر، هتكون بـ 4.99 دولار، الخدمة هتضم 100 دولة وهيتم إضافة عروض جديدة كل شهر، وقالت الشركة إنك ممكن تاخد اشتراك سنة مجانا لما تشتري Apple Tv أو Mac، وهيتم عرض مسلسلات حصرية فيه زي مسلسل “The Morning Show,” لجينفير أنينستون، ومسلسل “Dickinson,” وهو مسلسل درامي هتقوم ببطولته هيلي شتاينفيلد.

4-Apple Arcade  

 وهيتم إطلاق خدمة جديدة في 19 سبتمبر وهي  Apple Arcade في حوالي 150 دولة وهيكون فيها حوالى 100 لعبة وهتكون مع الخدمة التلفزيونية بمقابل 4.99 دولار في الشهر 

5- آيباد

 الشركة قالت إنها هتطلق إصدار آيباد جديد، وهيكون حجمة 10.2 بدل من 9.7 والكاميرا هتبقى بجودة 8 ميجابيكسل، وهيبقى أسرع مرتين من الكومبيوتر الأكتر مبيعاً، وهيكون متوفر من 30 سبتمبر

Comments: