في عيد ميلاده.. 7 أسباب لحب أشرف عبد الباقي

11/09/2019

كتبت: نوران عاطف

كمشاهد ومُعجب عنده ولاء لواحد من نجومه المفضلين، شوفت حياة أشرف عبد الباقي الفنية اتقسمت لقبل "راجل وست ستات" وبعدها، وعلى الرغم من إن التغيير والتنوع سمة مشروعة من سمات أي فنان، إلا إنه أما يكون تغيير جوهري في المسار وشكل الحاجة اللي بتتقدم ممكن يكون سبب تغيير مكانة الفنان معاه، أو على الأقل نقله من خانة الحب المطلق له في أي حاجة يعملها، لمجرد تقدير لبعض أعماله.

بس في حالة "عبد الباقي" هو بيفضل زي صاحب الطفولة الطيب اللي حتى لو الحياة أخدت كل واحد فيكوا في اتجاه هو بيفضل له نفس الغلاوة والمعزة، من ناحية تانية زي ما "أشرف" القديم كان له فضل كبير على الكوميديا نفسه، "أشرف" الجديد لسة له فضل بأجيال جديدة بيقدمها أصبحوا في الصدارة دلوقتي وإن كانوا مختلفين بشكل كبير عن أصالة ورونق "عبدالباقي".

في عيد ميلاده 11 سبتمبر بنحتفل بواحد من أهم فنانين الكوميديا في مصر بالإجابة على سؤال.. ليه بنحب أشرف عبد الباقي؟

1- "أشرف" له أسلوب كوميدي معتمد على مهاراته في إلقاء "الإفيه" حتى لو هيقول كلمة عادية، مش معتمد دايمًا على حلاوة النكتة أو على حركات مفرطة بجسمه، ممكن يقول إيفيهات طويلة بدور كبير زي مسرحية "باللو" وممكن يقول جملة واحدة في الفيلم كله زي "أنا أنا معاكوا في أي حاجة تعكنن على سيادة الباشا اللوا والعيال البهوات ولاد سيادة الباشا اللوا" في "الإرهاب والكباب" ويفضل معلم معاك بوضوح.

2- اختياراته كانت متفردة ومختلفة زي "رشة جريئة"، "خالي من الكوليسترول"، و"على جنب يا اسطى"  في وقت كان ممكن يتمسك أكتر بالقصص التجارية اللي نجاحها أكيد.

3- من ألطف وأوائل الفنانين اللي قدموا برامج في عصر الفضائيات زي "أصل الكلمة" و"دارك" اللي نجاح الفكرة خلاها بتتكرر بأشكال مختلفة كتير من فنانين مختلفين لحد دلوقتي.

4- ماعندوش حالة إنكار أو ادعاء نجومية زائف بتحصل لفنانين كتير، كان بيطلع في اللقاءات يتكلم بسلاسة ووضوح عن إن التليفزيون والمسرح نقطة قوة وجماهيرية له أكتر من السينما.

5- قدم شكل مختلفة للفوازير في "أبيض وأسود" مع علاء ولي الدين ومحمد هنيدي.

6- قدم باقتدار وتجديد مسلسلات الحلقات المنفصلة زي "مذكرات زوج معاصر" اللي كان مسلسل اجتماعي بيقدم دايمًا مشاكل الأزواج المصريين، وده  شخصياته مش بتختلف غير في ظروفها وتفاصيلها وأفكارها، لكنه قدر يلون في التفاصيل دي رغم إن الإطار ثابت.

7- قدر يقدم الدراما رغم البرواز اللي حواليه كفنان كوميدي، سواء في أعمال كانت خليط بين الاتنين زي "على جنب يا أسطى" أو أعمال درامية تمامًا "جبر الخواطر"، أو أعمال درامية كان هو اللي بيخفف وطأتها بشوية كوميديا زي فيلم "كلام الليل".

Comments: