مصريين بيفتكروا لحظة ضرب البرجين في 11 سبتمبر: "في الساحل وزعوا شربات"

11/09/2019

"كنت في البيسين في الساحل، طلعت لقيتهم بيوزعوا شوكولاتة وشربات عشان فاكرين إن روسيا ضربت أمريكا"، دي القصة اللي بتحكيها مرام عن لحظة ضرب برجين التجارة في مانهاتن يوم 11 سبتمبر 2001، اللحظة اللي عدت على كل سكان العالم عادية جدا وكل واحد غرقان في تفاصيله الشخصية، لكنها في الحقيقة غيرت -ولو بشكل طفيف- في حياة كل الناس دي، لأنها أثرت في خريطة العالم السياسية والاقتصادية.

في أحداث وكوارث حصلت في الكون بتفضل معلقة في ذاكرتك حتى لو حصلت وإنت صغير، زي زلزال 92 مثلا لو حضرته، أو زي أحداث 11 سبتمبر واللي غالبا هتكون فاكرها وفاكر يومها كنت فين وبتعمل إيه أو عرفت الخبر إزاي ورد فعلك عليه كان إيه وهل كان تعاطف ولا شماتة ولا مكنتش مدرك أصلا.

بعد حوالى 18 سنة من أحداث 11 سبتمبر، وبعد ما فات وقت طويل على الحدث ده لقينا ناس كتير كانت فاكرة الأحداث وشعورها تجاه الحدث ولما سألناهم كانوا فين وقت 11 سبتمبر وكانوا حاسيين بإيه كانت دي الإجابات:

1- "كنت في الشغل وباخد أجازة من الشغل قبل بداية الدراسة بـ 3 أيام، وكان أبويا وأمي في البيت بيتخانقوا على شرا لبس المدارس" - صدام

2- "بابا كان في أمريكا وقت الحادثة، كنا قاعدين قدام التلفزيون بنعيط لحد ما كلمنا وقال لنا إنه بخير" - نوران

3- "كنت عايش في السعودية، وكنت بتفرج على همام في أمسترادم لحد ما وصلتنا رسايل متحركة على الموبايل وكانت منتشرة وقتها، فيها خطين بالطول شبه البرجين وفي طيارة أو حاجة شبه الطيارة بتعدي بتوقعها" - صلاح

4- "كان عندي 11 سنة وكنت بتفرج على التلفزيون لحد ما جت الأخبار وكنت مبسوط إن أمريكا اتضربت، كلنا مبسوطين لحد ما خالي اللي كان بيقرا كتير في السياسة قال لنا إن ماينفعش نتبسط بده لأن في أرواح بريئة راحت والموضوع ليه علاقة بالمدنيين، عدى الوقت وشفت توابع الموضوع في 2003 في حرب العراق وكانت أول حرب متلفزة، وكنا بنشوف غارات أمريكا على العراق وساعتها قالوا إن صدام قوي وشجاع لأنه سايب الأنوار مفتوحة" - محمد

5- "كنت في البيت وقتها، بس فاكر إن شعبان عبدالرحيم عمل أغنية ليها علاقة بالحادثة" - عمرو 

6- "كنت في السعودية وراجعة مصر، أول ما روحت المطار عرفت إن الطيران في العالم كله وقف يومها، رجعت البيت عادي جدا" - دينا

7- "كان عيد ميلاد أختي وإحنا بنطفي الشمع شفنا الحادثة في الأخبار" - هدى

8- "كنت قاعد قدام التلفزيون باكل رز وملوخية وجات أهم الأنباء وعرفت منها" - خالد

9- "كنت بخطط أنا وبابا نروح ديزني لاند وحجزنا في آخر سبتمبر من يناير اللي قبله، وصحيت يومها لقيت بابا بيتفرج على التلفزيون، قولتله فيلم إيه ده؟ قالي ده مش فيلم دي حقيقة، وأنا كنت عارف إن أمريكا حاجة وحشة فسألته هو كده المفروض نتبسط؟ قالي لا" - أحمد 

Comments: