٧ فوايد علمية للقيلولة "نومة العصرية"

11/09/2019

القيلولة أو الغفوة السريعة شيء مقدس عند ناس كتير، ومرعب بالنسبة لناس تانية بتشوف إن ده ممكن يرهق ساعتهم البيولوجية أو يغير مواعيد النوم، وهنا حاولنا نجيب القول الفصل ونقول مميزات  نومة العصرية اللي ناس كتير مش مقدراها من وجهة نظر العلم وزي ما قدمها موقع "Tree Hugger".

1- بتزود كفاءة الذاكرة

بعد دراسة اتعملت على مجموعة أشخاص بياخدوا قيلولة ثابتة من 10 لـ 30 دقيقة، لقوا إن تركيزهم بيزيد وقدرتهم على اجتياز اختبارات الذاكرة في الساعتين ونص اللي بعد القيلولة.

2- بتساعد على خفض ضغط الدم العالي

طبقًا لدراسة اتنشرت في مجلة "Applied Physiology" قل معدل الوفيات من مرضى الشريان التاجي بنسبة 37% مرتبطين بعادة "القيلولة" وده مش معروف إذا كان بسبب عملية الاستلقاء والراحة اليومية ولا فكرة الغفوة نفسها.

3- بتهدي أعصابك

بعد اختبار مجموعة من الأشخاص في وقت الضهر لقوا إن ردود أفعالهم على اختبارات معينة بتتراوح بين الغضب والخوف والسعادة، وبعد إعادة نفس الاختبار الساعة ستة لقوا إن ردود الأفعال أكثر غضبًا، لكن لو الناس أخدت قيلولة حوالي 90 دقيقة ده بيخليهم في حالة أفضل.

4-بيخليك مفوق أكتر

ده منطقي طبعًا! وبيأكده إن بعد دراسات اتعملت على طيارين ورواد فضاء، لقوا إن 40 دقيقة قيلولة بتحسن الأداء 34% واليقظة 100%، فحتى لو مش هتسوق طيارة أو هتطلع الفضاء، قيلولة بسيطة ممكن تبقى حاجة كويسة قبل ما تسوق أو تروح مشوار طويل.

5- بتزود الإبداع

لو شغلك محتاج تركيز وأفكار جديدة باستمرار، القيلولة اليومية هتساعدك تبقى مركز أكتر ودماغك شغالة ومتجددة بشكل أحسن.

6- بتزود الإرادة

كل حاجة صعبة وإنت مش نايم كويس، وكل حاجة هتبقى محتاجة عزيمة وطاقة عشان تعملها، لو ما بتنامش كويس بالليل واخدت قيلولة في نص اليوم ده هيجدد طاقتك على التعامل مع كل الأمور.

7- أحسن من القهوة

زيادة وقت القيلولة عن حدها بيتعب لكن لو التزمت بوقت من 60 لـ 90 دقيقة وبعد دراسة اتعملت على مجموعة أشخاص لقوا إن قدرتهم على الإبداع والتركيز والحركة والكلام بقة أحسن مقارنة بـ "200 مللجرام" من القهوة.

Comments: