٨ أسباب منطقية تخليك ماتسافرش مع صحابك بدل ما تخسروا بعض

15/09/2019

أول ما بتحس إنك زهقان أو عايز تغيير جو أو بقالك كتير ماعملتش حاجة مختلفة، بتفكر على طول تسافر، وأكيد مش هتحب تسافر لوحدك وقليل جدا لو فكرت تسافر مع أهلك عشان زي ما إحنا عارفين إنك لو سافرت معاهم هتتخانقوا برضه سوا بس في مكان مختلف، المهم إنك هتفكر تسافر مع صحابك وغالبا هتختار صحابك القريبين منك عشان هتبقى معتقد إنك كده هتتبسط وهتستريح.

بس الحقيقة المُرة هي إن مش أي حد ينفع تسافر معاه وخصوصا صحابك القريبين، لإن الموضوع بيبقى أشبه بالجواز كده عايش مع نفس الشخص كذا يوم وممكن تبقى ماتعرفش غيره في المكان اللي إنت قاعد فيه، فالنتيجة اللي ممكن تخلص بيها السفرية إن ممكن إنت وصاحبك ده تقطعوا مع بعض، فمن الأول كده خلينا نقولك الأسباب المنطقية اللي تخليك ماتسافرش مع صاحبك عشان تفضلوا صحاب للأبد:

1- الروتين اليومي بتاعكوا مختلف:

نظريا كده هتحس إن الموضوع تمام ومافيش مشاكل يعني لما كل واحد يعمل اللي يريحه ويبقى فيه اختلاف في روتين اليوم، بس في الحقيقة إن الموضوع مرهق جدا لما واحد يقرر يصحى الساعة 7 الصبح ويفتح النور ويعمل دوشة ويقلب الأوضة، والتاني بيحب يبدأ يومه متأخر ويصحى الساعة 12 الضهر، ده بالنسبة للصبح، وبالنسبة لبعد الضهر مثلا هتلاقي صاحبك مثلا الساعة 2 الضهر قرر يلعب 10 ضغط وينط الحبل أو يعمل أكل، ممكن الموضوع يمشي أول يومين بس بعد كده هتجيبوا بعض من شعركوا.

2- نعمل كل حاجة حلوة سوا:

فيه نوع من الناس بيحب يشارك حاجات بسيطة مع الشخص اللي مسافر معاه ويقعد وقت طويل لوحدة ويستجم ويفكر زي إنه يفطر ويتغدى مع صاحبه وباقي اليوم يقعد مثلا قدام البحر مع نفسه أو يقرأ كتاب المهم إن يبقى له مساحته الشخصية، بس فيه نوع تاني بيبقى عايز يعمل كل حاجة حلوة مع صاحبة اللي مسافر معاه ياكلوا ويشربوا ويتفسحوا ويتصوروا سوا، لما النوعين المختلفين دول بقى بيسافروا مع بعض غالبا هيقطعوا علاقتهم ببعض بعد السفر.

3- الميزانية بتقى مختلفة:

فيه حجة حلوة أوي في الحالات اللي زي إنكوا مش هتيجوا هنا تاني فلازم تروحوا المكان الفلاني اللي ممكن تدفع فيه اللي وراك واللي قدامك عشان تاكل، فهتلاقي نفسك قاعد في المكان ده بتطلب إزازة مياه صغيرة وبتتفرج على صاحبك وهو بياكل أو هتتاطفس وتاكل معاه في أكله، ممكن يتهيألك كده إن ده تفكير أناني منه عشان بيفكر هو يتبسط بس، لكن الحقيقة إن من حقه يصرف فلوسه على الحاجة اللي تعجبه وللأسف إنت اللي فقير.

4- مفيش خطط:

الموضوع دايما بيبدأ كده يلا نروح الساحل أو يلا نروح دهب، اه حلو أوي يلا بينا اليوم الفلاني من غير ما تتفقوا خطتكوا هتبقى هناك عاملة إزاي ولا هتقضوا الوقت هناك إزاي، المهم إن ده بيسبب إنك تبقى عايز تروح البحر وهو عايز يروح حفلة أو إنت عايز تخرج تشوف المكان وتفرهد وهو عايز يتنح.

5- فيه واحد فيكوا خبرة في السفر والتاني لا:

فيه واحد فيكوا بيبقى دارس المنطقة بتفاصيلها والتاني ماشي وراه وخلاص وممكن يبقي مش عارف حاجة، في الغالب بقى الشخص اللي عارف المكان بيحس إنه خلف عيل صغير ماينفعش يسيبه لوحدة ولازم ياخد باله منه وخايف أحسن يتوه.

6- كل واحد فيكوا عنده موقف مختلف تجاه إنه يعرف ناس جديدة:

مبدئياً كده وإنتوا بتتفقوا على سفر ممكن واحد حد يجيب شريكه معاه والتاني لا، وده بيضايق الشخص السينجل اللي فيكوا عشان بيحس إنه زبلة لوحدة ومش لاقي حد يشاركه التفاصيل اللي التاني بيشاركها مع شريكه، وساعات ممكن تبقوا إنتوا الاتنين سنجيل عادي وتسافروا سوا لوحدكوا فيه واحد هيبقى عايز يتعرف على ناس جديدة وواحد تاني هيفضل قاعد مع الموبايل.

7- هتبقى الفوتجرافر بتاع شخص واحد:

بص صورني صورة جنب المكان ده، لا لا صورة تانية، بص لا الصورة دي غلط خدها من الزاوية دي، لا دي مهزوزة، لا دي أنا مغمض فيها، أه ساعات بيبقى حلو إنك تصور صاحبك صور حلوة بس مش تبقى الفوتجرافر الشخصي لصاحبك، وده في الغالب هيقلب بحرب باردة على أخر الرحلة.

8- دايما هيبقى فيه شكوى:

لو هتروحوا مكان سوا وأكيد هتركبوا مواصلات سوا، ولازم هتختلفوا في المواصلات هتركبوا إيه وإيه أحسن وأقصر طريق وأريح مواصلات غصب عنكوا هتدخلوا جدال كبير مالوش لازمة، وخلي بالك لو عملت اللي إنت عايزوا مش هتخلص من الشكوى ووجع الدماغ.

Comments: