٥ نصايح هتساعدك تعدي مرحلة الملل من شغلك

15/09/2019

الزهق هو الشبح، هو أفظع مشكلة بتطارد أي شخص، سواء من بيته، شغله، علاقاته، صداقاته، الزهق قادر يخليك تهد كل اللي عملته بعد ما تكون وصلت لإنجاز كبير شخصي أو مهني، بس الضغط الأكبر هو إنك تبقى زهقان لكن ما تقدرش تهد أو تمشي، وده اللي بيحصل لما تزهق من شغلك التزامك الأهم في الحياة، عشان كده جمعنالك شوية نصايح زي ما قدمها موقع "Forbes" هتساعدك تعدي مرحلة الملل من الشغل أو على الأقل تخففها.

1- نام كويس

يوم واحد من قلة النوم كفيل يخليك ما تقدرش تفكر خصوصًا لو بتشتغل في حاجة إبداعية، بجانب إنه ممكن يحفز مشاعر الزهق والخنقة ويكبرها أضعاف من حجمها الحقيقي.

2- زود من وعيك بنفسك وذكاءك العاطفي

في وقت الزهق سهل تقول إن وظيفتك مملة أو إن مديرك مش بيستغل مهاراتك بشكل كافي أو كويس، الوعي الذاتي مهم عشان تعرف مشاكلك الحقيقية إيه، ومحتاج إيه عشان تحلها.

3- اعمل تحدي الـ 30 يوم

حط لنفسك هدف جديد وتحدي تستنى نتيجته في خلال شهر، زي حاجة جديدة تتعلمها، أو منصب عايز توصله محتاج مؤهلات معينة.

4- غير في المكان حواليك

حاول تعلق صور بتحبها على الحيطة، تحط حاجات ملونة على مكتبك، هيفرق كتير في نفسيتك وإنت في المكتب.

5- فكّر نفسك بالهدف من اللي إنت بتعمله

فكر في شغلك وفايدته، سواء لزمايلك اللي حواليك، أو للي بتشتغل عشان تقدملهم حاجة، افتكر إيه مميزات شغلك؟ وليه إنت اخترته وبتشتغله؟ ده ممكن ينشط مشاعرك ويرجع حماسك، أو يصنعلك هدف جديد، الملل ساعات بيبقى له فوايد إنه بيخليك تاخد خطوة مهمة محتاج تاخدها، مش مجرد إنك تدور على تسلية لوقتك.

Comments: