٥ نصايح عشان لو قابلت الإكس صدفة

15/09/2019

من المواقف الموترة اللي الواحد ممكن يمر بيها هي إنه يقابل حد كان مرتبط بيه قبل كده، شخص كنت قريب وعارفين كل حاجة عن بعض ودلوقتي ده اتغير، مش عارف تتعامل معاه زي ما يكون حد غريب ولا صديق قديم ولا تعمل إيه! ده بجانب إن لو الموضوع ما كانش انتهى بشكل كويس، ولسة عندك مشاعر غضب أو إحراج أو حزن، الموضوع هيكون أصعب، عشان كده جمعنالك شوية نصايح ممكن تفيد في موقف زي ما قدمهم موقع "Elite daily".

1- ما تتكلمش كتير، كل ما تحاول تقصر في الكلام وتمشي يكون أفضل، مش لازم تحكي كل اللي حصلك من ساعة ما سبته، ولو حسيت عندك كلام كتير حاول تحدد معاد تاني تتكلموا فيه، عشان الموضوع يبقى تدريجي وما تبقاش متوتر.

2- ما تفكرش زيادة عن اللزوم في كل حاجة تتقال، لو قالك إن شكلك جميل، مش معناه إنه لسة بيحبك، لو سلم عليك بحرارة مش معناها إنه عايز يرجع، وافتكر إنك ممكن تكون بس في اللحظة دي حاسس إنك كنت مع الحد ده في علاقة عاطفية كويسة وغضبان منه لأنه بوظها، لكن إنت سبته في الأخر لسبب ما وممكن يكون سبب وجيه، دي صدفة عابرة ما توقفش حياتك عليها وتفضلش أسبوع تحكي لكل أصحابك على الموقف ده وتفكر في العلاقة كلها من الأول!

3- ما تتكلمش في الماضي.. ده دايمًا هينتهي بإنك قاعد تعيط في مكان عام وده مش لطيف!

4- ما تكدبش عن حياتك الحالية، مش محتاج تقول إنك مرتبط ومبسوط أو إنك قابلت حد أفضل، ده معناه إنك مش شايف نفسك كفاية ولك قيمة ومحتاج حاجات وهمية تديك القيمة دي.

5- خليك إنت الكبير، لو هو اللي غضبان حاول تحتوي الموقف، ولو إنت عارف إنه هيطلع غضبه عليك اكتفي بإنك تشاورله من بعيد أو ترحب بيه بس سريعًا من غير كلام كتير.

Comments: