وفاة طفلة بعد إصابتها بـ"الأميبا الآكلة للدماغ" بأسبوع واحد

17/09/2019

إمبارح الاتنين أكدت مدرسة  الابتدائية في ولاية تكساس الأمريكية على صفحتها على الفيسبوك وفاة بنت في المدرسة اسمها "ليلي ماي" بعد ما تم نقلها لمركز طب الأطفال في "فورت وورث" زي ما قالت جريدة "إندبندنت" البريطانية.

اللي حصل من الأول إن البنت كانت بتعوم مع أهلها في نهر "بارزوس" اللي قريب من "واكو" في ولاية تكساس الأمريكية وتم إصابتها بأميبا نادرة بتاكل الدماغ وفضلت تعاني من الحمى والصداع زي ما قالت عيلتها، وبعد أيام سلوكها اتغير وبدأت تتصرف بطريقة غريبة بعد كده عانت من أعراض هلوسة.

قالوا الدكاترة في المستشفى إن البنت اتصابت  بأميبا "نايغلريا فاولري" المعروفة بأسم الأميبا الآكلة للدماغ وهو كائن وحيد الخلية مميت وموجود في المياه العذبة الدافية زي الأنهار والينابيع والبحيرات العذبة، وموجودة كمان في التربة القريبة من تصريف المياه الدافية، وحمامات السباحة غير المعالجة بالكلور.

 ومن المعروف إن الأميبا دي بتدخل عن طريق الأنف وبعد كده بتوصل للدماغ، وبتهاجم الجهاز العصبي المركزي وبتتسبب في مرض التهاب السحايا الأميبي الأول، ومن التغيرات الأولى اللي بتظهر على الشخص هي تغيير الطعم والريحة والصداع والحمى والغثيان، وبتطور المرض من 3 لـ 7 أيام والوفاه بتتم في فترة بين 7- 14 يوم.

ومن وقت ما تم اكتشاف النوع ده من الأميبا في ستينات القرن الماضي، سجلت 145 حالة وفاة في الولايات المتحدة زي ما قالت المراكز الأميركية لمكافحة الأمراض والوقاية منها واللي نجوا من الوفاة بسبب المرض ده هما 4 حالات بس. 
 

Comments: