٩ نصايح عشان تسافر بره بأقل التكاليف

23/09/2019

بيقولوا دايما إن للسفر 7 فوايد بس أولهم إنك بتفلس ومابيبقاش معاك فلوس لما ترجع من السفر أو أخر كام يوم في السفرية أصلا، وده غالبا بيبقى بسبب تكاليف المواصلات سواء كان طيارة أو سوبر جيت، وتكاليف الفنادق اللي ممكن تقعد فيها

بس موقع Brightside جمع 9 نصايح ممكن تعملهم لما تسافر خصوصا لو هتسافر برا، هيوفروا معاك في التكاليف وممكن يخلوك تسافر بتكاليف أقل وهما:

1- استخدم مواصلات كتير بلاش مواصلة واحدة:

حاول على قد ما تقدر تقتصد في فلوس المواصلات، بمعنى شوف عروض شركات الطيران وشوف إيه أرخص، والقاعدة الأساسية وإنت بتدور على تذاكر للسفر هي إنك مش لازم تحجز للمدينة نفسها اللي إنت رايحها، على سبيل المثال يعني لو مسافر روما مش لازم تسافر على روما، ممكن تسافر على البندقية وبعدها خد قطر من البندقية لروما هيبقى أرخص لإن الرحلات المحلية والقطر بتبقى أرخص من الطيارة.

2- ماتأجرش عربيات في المدن الكبيرة:

تأجير العربيات بيبقى فكرة كويسة لو هتتنقل بين المدن جوا البلد، بس إنك تأجر عربية عشان تتنقل بيها جوا المدينة ممكن يبقى عبء عليك أصلا بسبب مشاكل المرور والركنة والكلام ده كله، وأحسن حل عشان تتنقل جوا المدينة هي المواصلات العامة أو إنك تأجر عجلة مثلا.

3- دور على عروض:

فيه شركات مواصلات كتير بتوفر عروض للسياحة، زي مثلا في إنجلترا ممكن لما تشتري تذكرة قطر تاخد معاها واحدة هدية وده عشان تشوف الأماكن السياحية براحتك.

4- سافر خفيف:

سافر بشنط وهدوم أقل ما يمكن وده هيساعدك تقلل تكاليف السفر لإن فيه شركات طيران بتقلل سعر التذكرة لو حد معاه شنط أقل، فمثلا لو سافرت من  بيلوند في الدنمارك لبرلين عن طريق ريان إير الموضوع هيكلفك 1 يورو لكن لو معاك شنط الموضوع هيكلفك 15 ضعف.

5- اختيار الشقق:

اسكن في شقق أحسن من الفنادق، لإن الميزة الوحيدة اللي الشقة بتتميز بيها هي إن فيها مطبخ وممكن تعمل لنفسك أكل وده مش هيخليك تصرف فلوس، وبرضه لو عايز تاكل من برا تقدر تعمل ده براحتك، وتقدر تدور على شقة من خلال تطبيقات مخصوص معمولة للشقق دي.

6- زور متاحف ببلاش:

فيه متاحف كتير فيها ساعة مجانية أو حتى أيام كاملة، مثلا "كولوسيوم" محدد إن كل يوم 1 من الشهر أو الحد الأول من كل شهر بيقبل الزوار مجاناً، ومتحف "برادو " في مدريد محدد من الساعة 6 للساعة 8 بيبقى الدخول مجاني برضه

7- ادفع بالعملة المحلية بالكارت:

في محلات ممكن تدفع فيها بالكرديت كارد، وبتختار وقتها تدفع بعملتك ولا بالعملة المحلية للبلد اختار وقتها العملة المحلية للبلد، لإن لما تختار عملتك الفلوس بتتحول وده غالبا هيضيف 10% رسوم إضافية.

8- ماتلتزمش بتواريخ معينة:

ممكن لو عايز تطلع رحلة في وقت معين ومظبط حياتك على أساس الأيام دي، وإنت بتحجز تلاقي إن اليومين اللي قبلها أرخص أصلا، فبدل ما تظبط إجازة مثلا يوم 10 في الشهر قول إنك ممكن تسافر على نص الشهرة مثلا، ودور على أرخص تذاكر في الوقت ده.

9- استخدم محركات البحث المحلية:

فيه مواقع عالمية بتلاقي عليها عروض حلوة للسفر زي Booking مثلا و Skyscanner، لكن برضه شوف إيه المواقع المحلية اللي زيهم في البلد اللي إنت رايحها وهتلاقي عروض حلوة.

Comments: