إزاي ترد على المجاملة من غير ما تقول كلام مريب

03/10/2019

من الحاجات اللي تبدو بديهيات لكن بيقف فيها ناس كتير هي إنك ترد على حد بيقولك "شكلك حلو النهاردة"، "الله ينور على الشغل"، "متألق الفترة دي"..إلخ يعني إنك ترد على حد بيجاملك أو بيقولك كلمة لطيفة!

وعشان جملة "ما بعرفش أرد على الحاجات دي بقة شائعة أو إنك تندفع وتقول رد غريب مالوش علاقة بالموضوع جمعنالك شوية نقط ممكن تفكر فيهم عشان ترد.

1- ما تخليش الناس تتحرج عشان جاملتك!

مش معنى إنك حد قالك كلمة حلوة إنك المفروض تقوله إنت كمان حاجة حلوة عنه، ده بيبان إنه مش حقيقي ومجرد كلام، ما تخليش الموقف يغريك بإنك تقول أي كلام.

2- ما تقللش من نفسك أوي عشان تبان متواضع

لو كنت من الناس المتواضعة ومش عايز تبان إنك مستني ثناء عشان حاجة عملتها، مش هيبقى كويس لو بردو قولت إن ده مش حاجة أو مفيش حاجة تستحق، كفاية إنك مثلًا لو حد بيقولك شكلك حلو تقول إن ده اللبس أو اللون هو اللي عامل التأثير، خلي الحوار خفيف وبيمشي لقدام.

3- ما تتجاهلش المجاملة

بردو ما ينفعش تتجاهل الكلام كأنك ما سمعتهوش وتسكت خالص، ده هيخلي اللي قاله يا إما هيقوله تاني ويفتكر إنك ما سمعتش أو هيحس بالرفض ويتحرج وأكيد ده مش كويس.

4- ما تهينش نفسك

يعني على سبيل المثال لو حد قالك قصة شعرك حلوة، ما تقولش كان لازم اختارها عشان تخفي الصلع في الحتة دي، أو عشان مناخيري كبيرة فتعمل توازن، ده مش هيخلي اللي قدامك ينسى المجاملة لكن هيشوف مشاكلك ومش بالشكل اللي إنت متوقعه.

5- عبر عن امتنانك ببساطة

لو ما تعرفش تقول كلام فيه دعابة أو مفيش فرصة لده، كفاية إنك تقول شكرًا ببساطة، وتأكد إنك سمعت وقدرت اللي اتقالك.

6- هتقول إيه بعد كده؟

طبعًا هي "شكرًا" كافية مع تعبيرات وش لطيفة بتعبر عن ده، لكن بتيجي بعدها لحظات صمت كده، فيه ناس بتتحرج فيها ومش بتستحملها، هنا ممكن تستخدم المجاملة عشان تفتح موضوع، زي مثلًا لو حد قالك مبروك الجايزة اللي أخدتها، ممكن تبدأ تقول إنك استمتعت بوقت التجهيز للمسابقة، أو أرهقت في الوقت الأخير..إلخ وتحكي عن الأحداث المتعلقة بالحاجة.


 

Comments: